Мемлекет басшысы «ToshTech» университетінің қызметімен танысты
Президент Шавкат Мирзиёев Алмазар ауданына сапары барысында «ToshTech» техникалық университетінің қызметімен де танысты.
Мемлекет басшысының 2025 жылғы 8 қыркүйектегі тиісті шешімі негізінде құрылған университет жоғары инженерлік білім беруді трансформациялау жолындағы маңызды қадам болды. Жобаның жалпы құны 69,5 миллиард сумды құрайды.
Осы қаражат есебінен Ташкент мемлекеттік техникалық университетінің жеті қабатты оқу ғимараты толық реконструкцияланып, ең заманауи зертханалық және оқу құралдарымен жабдықталды.
Бұл жоғары оқу орны академиялық, қаржылық және ұйымдастырушылық-басқару тұрғысынан дербес мемлекеттік жоғары білім беру мекемесі болып саналады. Белгіленген бағдарламаға сәйкес, 2030 жылға дейін Ташкент мемлекеттік техникалық университетінің тиісті факультеттері мен кафедралары кезең-кезеңімен осы жаңа инновациялық экожүйеге трансформацияланады.
Жаңа университетке жастардың қызығушылығы өте жоғары болды. 2026/2027 оқу жылына жалпы 1 654 талапкер құжат тапсырды. Білімді әрі дарынды деп танылған 400 студент іріктеліп, оқуға қабылданды. Алғашқы қабылданған студенттердің барлығы 100 пайыз мемлекеттік грант негізінде білім алып жатыр. Бұл жеңілдік сақталады және 2029/2030 оқу жылына дейін қабылданатын студенттердің барлығы толық грантпен қамтылады.
Университетте оқу процесі толықтай ағылшын тілінде жүргізіледі. Сабақтарды жергілікті ғалымдармен қатар біліктілігі жоғары шетелдік мамандар өткізеді.
Студенттер өнеркәсіптік инженерия және менеджмент, электр инженериясы, энергетика инженериясы, материалтану және нанотехнологиялар сияқты төрт бағыт бойынша білім алады.
«ToshTech» халықаралық деңгейде мойындалған білім беру брендтерімен ықпалдастырылған. Университет әлемдегі беделді жоғары оқу орындарымен, соның ішінде Қытайдың Шанхай Цзяо Тонг университеті, Италияның Милан политехникалық университеті, Германияның Бремен конструкторлық университеті және әлемге әйгілі «Boston Consulting Group» консалтинг компаниясымен тығыз ынтымақтастық негізінде құрылды.
Университеттің басты мақсаты – құрғақ теориядан бас тартып, студенттерді алғашқы курстардан бастап нақты өнеркәсіптік жобалар мен күрделі инженерлік мәселелерді шешуге үйрету. Осыған байланысты студенттердің оқу кезінде тәжірибеден өтуі және болашақта кепілді жұмысқа орналасуы үшін еліміздегі және әлемдегі ірі өнеркәсіп компанияларымен тығыз байланыс орнатылған. Олардың қатарында «ACWA», «UzAuto Motors», «Жылу электр станциялары» және «Аумақтық электр желілері» секілді ірі компаниялар бар.
Мемлекет басшысына университеттің алдағы жоспарлары туралы ақпарат берілді.
Оқытушылар және студенттермен әңгімелесу барысында «ToshTech» техникалық университеті еліміздің өнеркәсіптік әлеуетін жаңа деңгейге көтеретін инженерлердің жаңа буынын даярлайтын инновациялық орталыққа айналуы қажеттігі атап өтілді.
– Тағы да қайталап айтамын, адамның мүлкі, мәртебесі немесе басқа да материалдық байлығы уақытша болуы немесе жоғалуы мүмкін. Ал оның басындағы білімі мен тәжірибесін ешкім де, ешқандай күш те тартып ала алмайды. Білім – адамның ең қауіпсіз әрі ең пайдалы инвестициясы, – деді Мемлекет басшысы.
Президентіміз университет студенттерімен бірге естелік суретке түсті.
