Мемлекет басшысы Ташкент облысындағы жаңа әлеуметтік қорғау кешенінің жұмысымен танысты

Мемлекет басшысы Ташкент облысының Нурафшан қаласында жаңадан салынған Ұлттық әлеуметтік қорғау агенттігінің Әлеуметтік қорғау кешенінде болып, мұнда жасалған жағдаймен танысты.

Өзбекстанда халықты әлеуметтік қорғау жүйесін нығайту, азаматтарға көрсетілетін мемлекеттік әлеуметтік қызметтердің ауқымы мен түрлерін кеңейту бағытында жүйелі жұмыстар жүргізілуде.

Ташкент облысында алғаш рет ашылған бұл кешен Әлеуметтік қорғауды қажет ететін азаматтарға барлық негізгі қызметті бір жерде алуға мүмкіндік береді.

Кешен құрамында бес мекеме жұмыс істейді. Атап айтқанда, Әлеуметтік ұлттық қорғау агенттігінің Ташкент облыстық басқармасы, өңірлік Әлеуметтік инспекция, Нурафшан қаласындағы «Инсон» әлеуметтік қызметтер орталығы, медициналық-әлеуметтік сараптама комиссиясы және өңірлік әлеуметтік қызметтер орталығы орналасқан.

Жаңа кешеннің іске қосылуы нәтижесінде жыл сайын Нурафшан қаласы мен оған іргелес «Орта Шыршық», «Піскент», «Аққорған» және «Бөке» аудандарындағы шамамен 10 мың азамат әлеуметтік қызметтермен қамтылады.

Мекемеде 100-ге жуық маман еңбек етеді. Олар әлеуметтік қорғауды қажет ететін азаматтардың қоғамға толыққанды бейімделуіне және дербес өмір сүруіне қолдау көрсетеді.

Сонымен қатар өңірлік әлеуметтік қызметтер орталығында азаматтардың жеке қажеттіліктеріне қарай мемлекеттік емес сектордың мүмкіндіктерін тарта отырып, әлеуметтік қызметтің бес түрі көрсетіледі.

Бұл бастама ұзақ уақыт бойы үйден шыға алмайтын мүгедектігі бар адамдардың, бөгде адамның күтіміне мұқтаж азаматтардың және ерекше қажеттілігі бар балалардың қоғамға бейімделуіне мүмкіндік береді.

Осы жерде Мемлекет басшысына жасанды интеллект көмегімен мүгедектігі бар адамдарды жаңа стандарттар бойынша диагностикалау жүйесі, сондай-ақ Ташкент облысының тәжірибесі негізінде махалладағы әлеуметтік қызметкерлердің жаңартылған жұмыс тетіктері таныстырылды.

Президентіміз әлеуметтік қорғауды қажет ететін азаматтарды қолдау, олардың қоғамға толыққанды бейімделуіне және белсенді өмір сүруіне жағдай жасау мемлекеттік саясаттың басым бағыттарының бірі екенін атап өтті.

Осыдан кейін Мемлекет басшысы Әлеуметтік ұлттық қорғау агенттігінің Ташкент облысындағы «Инсон» еріктілер тобымен кездесіп, олардың жүзеге асырып жатқан жобаларымен танысты. Кешеннің жұмысын жоғары бағалап, республика бойынша осындай өңірлік әлеуметтік қызмет көрсету орталықтарының санын үш есеге арттыруды тапсырды. 

Айта кетейік, қолданыстағы мүмкіндіктерді одан әрі кеңейту арқылы республикадағы өңірлік әлеуметтік қызмет көрсету орталықтарының санын кемінде 90-ға жеткізу жоспарланып отыр. Жаңа орталықтар әлеуметтік қорғауға мұқтаж тұрғындар көп шоғырланған, көлік қатынасы қолайлы әрі азаматтардың оңай қатынап-келуіне мүмкіндік бар елді мекендерде ашылатын болады.