Масъулияти чекланган жамиятлар фаолиятига замонавий корпоратив бошқарув тизими жорий этилади

Адлия вазирлиги томонидан ишлаб чиқилган янги таҳрирдаги “Масъулияти чекланган жамиятлар тўғрисида”ги қонун 2026 йил 21 апрелда қабул қилинди.

Қонун билан масъулияти чекланган жамиятлар фаолиятига замонавий корпоратив бошқарув тизими жорий этилади. Соҳадаги ҳуқуқий бўшлиқлар бартараф этилиб, жамият иштирокчиларининг ҳуқуқий кафолатлари янада кучайтирилди.

Қонун билан жамият кузатув кенгашининг ваколатлари ҳамда кенгаш аъзоларини сайлаш тартиби белгиланди. Бу орқали келгусида келиб чиқиши мумкин бўлган низоли ҳолатларнинг олди олинади. 

Жамият кузатув кенгашининг қарорларини сиртдан овоз бериш йўли (сўров йўли) билан қабул қилиш тартиби аниқ белгиланди. 

Қонундаги яна бир муҳим янгилик – бу халқаро корпоратив бошқарув амалиётида мавжуд бўлган жамиятнинг кузатув кенгаши аъзоларининг, яккабошчилик асосидаги ижро этувчи ва коллегиал ижро этувчи органларининг фидуциар мажбуриятлари белгиланганидир.

Қонун билан жамият нафақат лицензия, балки бошқа рухсат этувчи ҳужжатлар ва хабардор қилиш тартибида фаолият турлари билан шуғулланиши мумкинлиги белгиланди. Бу эса, улар томонидан амалга ошириладиган фаолият турлари сонини оширади.

Амалдаги қонунчиликда мавжуд бўлмаган жамиятларнинг филиали ва ваколатхоналари, шўъба ва қарам хўжаликларини очиш тартиблари алоҳида модда сифатида белгиланди. 

Қонун расмий эълон қилинган кундан эътиборан 3 ой ўтгач кучга киради. 

Н.Абдураимова,

ЎзА