Лондонда Өзбекстан тәуелсіздігінің 35 жылдығына арналған салтанатты шара өтті
Әлемнің түрлі елдерінде Өзбекстан тәуелсіздігінің 35 жылдығына арналған мерекелік шаралар өтіп жатыр. Осындай мәдени шаралар жалғасы ретінде Өзбекстан Республикасының тәуелсіздігінің 35 жылдығына арналған салтанатты кеш Лондон қаласында да ұйымдастырылды.
Оған шетел мемлекеттерінің Ұлыбританиядағы елшілері мен дипломатиялық өкілдіктерінің қызметкерлері, осы елдің үкіметі мен парламентінің өкілдері, іскерлік және академиялық орта өкілдері, сондай-ақ өзбекстандықтар қатысты.
Шара барысында Өзбекстанның мәдениет министрі Озодбек Назарбеков бастаған өнерпаздар делегациясының қатысуымен мазмұнды әрі сан алуан мәдени бағдарлама ұсынылды. Бағдарламада Өзбекстанның халық әртістері Севара Назархан мен Тахир Қазиев, әнші Бахром Назаров, «Doppi Twins» тобы және ұлттық би ансамблі өнер көрсетіп, өздерінің қайталанбас өнерін көпшілікке ұсынды.
Музыкалық қойылымдар мен ұлттық билер шараға көтеріңкі көңіл күй сыйлап, қонақтарға өзбек өнерінің бай тарихы мен заманауи келбетін тағы бір мәрте танытты. Әсіресе ұлттық әуендер шырқалған сәттерде залда Өзбекстанға тән шынайылық пен жылы ахуал орнады. Өнерпаздардың жанды орындауы шетелдік қонақтардың да үлкен қызығушылығын тудырды.
Шараға қатысушылар Өзбекстанның бай мәдени мұрасына, ұлттық құндылықтары мен өнер дәстүрлеріне жоғары баға берді. Ұлттық би ансамблінің өнері өзбек халқының ғасырлар бойы қалыптасқан әсемдігін, жігері мен эстетикалық талғамын айқын көрсетті. Кеш барысында қазіргі Өзбекстанның мәдени әлеуеті мен әлемге ашықтығы да кеңінен көрініс тапты.
Айтулы шара тәуелсіздік мерекесін атап өтумен қатар, Өзбекстан мен Ұлыбритания арасындағы мәдени-гуманитарлық байланыстарды одан әрі нығайтуға ықпал ететін маңызды диалог алаңына айналды. Қонақтар Өзбекстанның бүгінгі дамуы, елде жүзеге асырылып жатқан реформалар мен жаңа мүмкіндіктер жөнінде де пікір алмасты.
Салтанатты кеш барысында Өзбекстанның ұлттық нышандарын, салт-дәстүрлері мен құндылықтарын халықаралық қауымдастыққа кеңінен танытуға ерекше мән берілді. Шара қонақтарына Өзбекстаннан арнайы шақырылған аспаздар тобы әзірлеген ұлттық тағамдар ұсынылды.
Лондонда өткен бұл салтанат Өзбекстан тәуелсіздігінің жыл өткен сайын халықаралық деңгейде кеңінен аталып өтіп келе жатқанының тағы бір жарқын көрінісі болды.
Кеш барысында әуелеген музыка, ұсынылған ұлттық өнер мен тарту етілген тағамдар бір мақсатқа – Өзбекстанның қайталанбас келбетін әлемге таныту идеясына тоғысты.
