Лондон турнирида Камилла Раҳимованинг омади келди
Теннисчимиз нимчорак финалда британиялик Ҳэрриет Дартга қарши баҳс олиб борадиган бўлди.
Буюк Британиянинг Лондон шаҳрида теннис бўйича WTA 500 таснифига кирувчи, мукофот жамғармаси 1 миллион 915 минг АҚШ долларини ташкил этувчи мусобақада нимчорак финал баҳслари бошланди.
Қувонарлиси, мамлакатимизнинг биринчи рақамли теннисчиси Камилла Раҳимова ушбу босқичда иштирок этадиган бўлди. Шуни таъкидлаб ўтиш лозимки, теннисчимиз аслида саралаш босқичининг ҳал қилувчи ўйинида германиялик Татьяна Марияга мағлуб бўлган эди. Бироқ у кейинчалик “lucky loser” (омадли мағлуб) сифатида асосий тўрга йўлланма олди ва тўғридан-тўғри 1/8 финалга чиқди.
Энди теннисчимиз нимчорак финалда британиялик Ҳэрриет Дартга қарши баҳс олиб борадиган бўлди. Учрашув Тошкент вақти билан соат 15:30 га белгиланган.
Маълумот ўрнида, ушбу мусобақада яна бир вакилимиз Полина Кудерметова саралаш баҳсларидан ғолибона ўтган эди. Бироқ Полина асосий тўрнинг илк босқичида чехиялик Мари Бузковага қарши баҳсда имкониятни бой бериб қўйди.
Жавоҳир Тошхўжаев, ЎзА
