Кубага Россия нефть танкери учун йўл очилди
АҚШ Президенти Дональд Трамп Кубага нисбатан амал қилаётган кескин иқтисодий чеклов асносида кутилмаган қарор қабул қилиб, Россияга тегишли нефть танкери Куба портига киришига қаршилик қилмаслигини билдирди. Унинг таъкидлашича, Кубадаги мавжуд сиёсий тизим ўзгариш арафасида бўлиши мумкин, бироқ мамлакат аҳолиси ҳозир оғир энергетик танқисликни бошдан кечирмоқда.
Шу боис оддий фуқароларнинг кундалик эҳтиёжини инобатга олиб, нефть етказиб беришга рухсат берилган. Етакчининг фикрича, бир танкер киритилиши мамлакатдаги сиёсий вазиятни ўзгартирмайди, аммо аҳолига маълум даражада енгиллик яратади. Сўнгги ойларда Кубада нефть танқислиги жиддий сезилмоқда. АҚШнинг Венесуэла нефть экспортига нисбатан чеклови ва бошқа давлатларга босими натижасида мамлакатга ёнилғи кириб келиши кескин қисқарган. Бу эса электр таъминоти узилиши, бензин тақчиллиги ва ёнилғи меъёр асосида тақсимланишига олиб келган. Айниқса, шифохоналар фаолияти жиддий салбий таъсирга учраган. РФнинг санкция остидаги “Анатолий Колодкин” нефть танкерига тахминан 650-730 минг баррель хом нефть ортилган. Бу миқдор одатий шароитда икки ярим ҳафтага, тежамкорлик билан ишлатилса, бир ойга етади. АҚШ Соҳил қўриқлаш хизмати ушбу кемани тўхтатмасликка қарор қилди. Мутахассислар мазкур қарорни халқаро вазият билан боғламоқда. Яъни, Яқин Шарқдаги кескинлик ва нефть бозоридаги беқарорлик туфайли чеклов сорачи нисбатан юмшатиляпти. Қолаверса, АҚШ раҳбарияти кейинчалик Кубадаги сиёсий вазиятга янада жиддий эътибор қаратишини билдирган.
Ф. Яхшибоева, ЎзА
