Кўп тилли мижозларни қўллаб-қувватлаш маркази ишга тушиши муҳокама қилинди
Етакчи халқаро компаниялардан бири бўлган iSON Xperiences Customer Experience (CХ) ва Business Process Outsourcing (BPO) 19 та мамлакатда 40 дан ортиқ операцион марказ орқали ҳар ой 50 миллиондан ортиқ мижозга хизмат кўрсатади.
Ўзбекистон Республикаси Рақамли технологиялар вазири Шерзод Шерматов iSON Xperiences компаниясининг бош операцион директори Рами Свейс билан учрашди. Музокараларда IT Park Uzbekistan Экспортини ривожлантириш бўйича директори Жаҳонгир Кагиров бошчилигидаги делегация ҳам иштирок этди.
Муҳокамалар давомида эътибор Ўзбекистонда 100 та иш ўрнига эга кўп тилли мижозларни қўллаб-қувватлаш марказини ташкил этувчи биринчи лойиҳани ишга туширишга қаратилди.
Шунингдек, компания инглиз, немис, турк ва бошқа тилларда мижозларни қўллаб-қувватлашни таъминлайдиган жамоаларни шакллантириш орқали ўз фаолиятини босқичма-босқич кенгайтириш режаларини баён қилди.
Шунингдек, IT Park Uzbekistan халқаро BPO компаниялари учун мавжуд қўллаб-қувватлаш механизмлари, мутахассисларни тайёрлаш ва лойиҳа амалга оширилишининг барча босқичларида ҳамкорлик имкониятларини тақдим этди.
А.РУСТАМОВ,
ЎзА
