Киев ва Будапешт яна “тўнни тескари кийди”
Киевнинг янги минтақавий форуми атрофида Будапешт билан яна келишмовчилик юзага келди. Бош вазири Петер Мадьяр мамлакати “Карпат саккизлиги”га розилигисиз киритилганини айтса, Киев бу позицияни собиқ ҳукумат сиёсати билан боғлади.
Владимир Зеленский ўтган ҳафта “Карпат саккизлиги”ни инвестиция, хавфсизлик, энергетика ва савдо соҳаларида ҳамкорликни кучайтириш учун ташкил этган эди. Венгрия номи форум иштирокчилари рўйхатида кўрсатилган, аммо Будапешт таклифни қабул қилмаганини билдирди. Ташқи ишлар вазири Андрей Сибига Мадьярни Виктор Орбаннинг “тўсқинлик ва яккаланиш” сиёсатини давом эттиришда айблади. Бош вазир эса суверен давлатни розиликсиз халқаро ҳамкорлик тузилмаси аъзоси сифатида эълон қилиш “мутлақо қабул қилиб бўлмайдиган ҳолат” деб атади.
Тортишувга энергетика масаласи ҳам қўшилди. “Нафтогаз” Венгриянинг MOL компанияси билан нефть захирасини сақлаш иншоотлари қуриш бўйича келишувга эришган. Бу режа Орбаннинг “Фидес” партияси томонидан хавфсизликка таҳдид сифатида баҳоланди. Шу тариқа икки давлат ўртасида сўнгги ойларда кузатилган яқинлашув яна сўроқ остига тушди: Будапешт аввал Киев билан амалий ҳамкорликни кучайтиришга тайёрлигини билдирган бўлса, кейинроқ Украинанинг Европа Иттифоқига қўшилиш музокараси бўйича ветони қайта тиклади.
Мусулмон Зиё, ЎзА
