Кегейлида етиштирилган мош хорижга экспорт қилинмоқда
Қорақалпоғистон Республикаси Кегейли туманида фаолият юритаётган “Global Export Kegeyli” масъулияти чекланган жамияти қишлоқ хўжалиги маҳсулотларини, хусусан, мошни қайта ишлаш ва экспорт қилишга ихтисослашган.
2025 йилда ташкил этилган корхона Хитой ва Туркиядан келтирилган замонавий автоматлаштирилган ускуналар билан жиҳозланган. 10 нафардан зиёд киши доимий иш билан таъминланган мазкур корхонада йилига минг тоннага яқин мош қайта ишланмоқда.
Айни кунларда корхонада иш жараёнлари қизғин давом этмоқда. Маҳаллий фермер хўжаликлари томонидан етиштирилган мош сараланиб, қайта ишланмоқда ва ташқи бозорларга жўнатиш учун тайёрланаяпти.
[gallery-32049]
Корхона маҳсулотлари Хитой, Россия ва Германия давлатларига экспорт қилинмоқда. Йиллик экспорт ҳажми 1 миллион АҚШ долларига яқинни ташкил этади.
Мақсад ҲАБИБУЛЛАЕВ (сурат), ЎзА
