Jizzaxda yashil inqilob: G‘allaorolning intensiv bog‘lari
O‘zbekiston zaminida kechayotgan yangilanishlar nafaqat shaharlar qiyofasida, balki chekka hududlardagi adirlarning bog‘-rog‘larga aylanayotganida ham yaqqol namoyon bo‘lmoqda.
Jizzax viloyatida qishloq xo‘jaligini modernizatsiya qilish, eksportbop mahsulotlar yetishtirish va ekologik barqarorlikni ta’minlashga qaratilgan izchil islohotlar zamirida inson qadrini ulug‘lash va xalqimiz farovonligini oshirishdek ezgu maqsad mujassam.
Davlatimiz rahbari Shavkat Mirziyoyev ta’kidlaganidek: “Biz qishloq xo‘jaligida qo‘shimcha qiymat zanjirini yaratishimiz, yerga bo‘lgan munosabatni tubdan o‘zgartirishimiz kerak. Agrar soha iqtisodiyotimizni harakatga keltiruvchi asosiy drayverlardan biri bo‘lishi shart”. Ana shu strategik vazifa ijrosi sifatida 2026-yil 9-aprel kuni G‘allaorol tumanining “Chayanli” mahallasi hududida “yashil iqtisodiyot” tamoyillarini o‘zida jamlagan yirik loyiha — 115 gektar maydonda intensiv gilos bog‘ini barpo etishga start berildi.
Bugungi kunda “Yashil makon” umummilliy harakati shunchaki ko‘chat ekish tadbiri emas, balki kelajak avlod uchun sog‘lom ekologik muhit va mustahkam iqtisodiy zamin yaratish kafolatiga aylandi. G‘allaorol tumani hokimi Jalolitdin Oqboyev va viloyat hokimi o‘rinbosari Zafar Ro‘ziyev ishtirokida boshlangan ko‘chat ekish jarayonlarida nafaqat mutaxassislar, balki nuroniylar va jamoatchilik vakillarining ham faol qatnashgani xalqimizning bunyodkorlik ruhidan dalolat beradi.
[gallery-28665]
“BMB Holding” tarkibidagi “BMB Gardens” korxonasi tomonidan amalga oshirilayotgan ushbu loyiha doirasida avval suv ta’minoti og‘ir bo‘lgan qarovsiz yerlar o‘zlashtirilib, zamonaviy agrotexnologiyalar asosida jonlantirilmoqda. Niderlandiya va Polsha davlatlaridan keltirilgan, In vitro usulida yetishtirilgan “Batirma” navli achchiq gilos ko‘chatlarining 50 ming tupi endilikda bu zaminga yangi hayot bag‘ishlaydi. Umumiy qiymati 350 milliard so‘m bo‘lgan ushbu tashabbus nafaqat yiliga 1000 tonna eksportbop mahsulot beradi, balki 850 nafarga yaqin vatandoshimiz uchun doimiy va mavsumiy ish o‘rni yaratadi.
Qishloq xo‘jaligi bo‘yicha falsafa doktori Sobir Egamberdiyevning e’tirof etishicha, bu kabi intensiv bog‘lar ilm bilan amaliyotning uyg‘unlashuvi natijasidir. Hududda barpo etilgan zamonaviy infratuzilma — tomchilatib sug‘orish tizimi, artezian quduqlari va suv havzalari suvdan oqilona foydalanish madaniyatini yuksaltiradi.
Prezidentimiz ilgari surgan: “Qishloq xo‘jaligida ilm bo‘lmasa, natija ham bo‘lmaydi. Biz yerdan foydalanishning eng zamonaviy, tejamkor va samarali usullarini qo‘llashimiz zarur” degan tamoyil G‘allaorol misolida o‘z tasdig‘ini topmoqda. Mazkur loyiha nafaqat Jizzax viloyatining, balki butun mamlakatimizning eksport salohiyatini oshirishga xizmat qiladigan istiqbolli qadamdir.
G‘allaorol adirlarida qad rostlayotgan yangi bog‘lar mamlakatimizda kechayotgan shiddatli islohotlarning amaldagi ifodasidir. Zero, bugun ekilgan har bir ko‘chat ertaga nafaqat tabiatga ko‘rk, balki xalqimiz dasturxoniga qut-baraka, milliy iqtisodiyotimizga esa raqobatbardoshlik olib keladi. Zero, Prezidentimiz ta’kidlaganidek: “Xalqimiz boy bo‘lsa, davlat ham boy va qudratli bo‘ladi”.
Jizzax zaminidagi bu xayrli ishlar O‘zbekistonning “yashil taraqqiyot” yo‘lidagi qat’iy irodasi va porloq kelajagi ramzi bo‘lib qolaveradi.
A. Qayumov, J. Yorbekov O‘zA muxbirlari
