Jizzaxda mebel sanoati o‘smoqda
2026-yilning dastlabki ikki oyi yakunlariga ko‘ra, Jizzax viloyatida yirik sanoat korxonalari tomonidan 16,1 milliard so‘mlik mebel mahsulotlari ishlab chiqarildi. Bu haqda O‘zbekiston Respublikasi Milliy statistika qo‘mitasi ma’lum qildi.
Mazkur ko‘rsatkich hududda mebelsozlik tarmog‘i barqaror rivojlanayotganini anglatadi. So‘nggi yillarda viloyatda kichik sanoat zonalari, ixtisoslashgan ishlab chiqarish quvvatlari va xususiy korxonalar soni ortib, tarmoqning iqtisodiyotdagi ulushi izchil mustahkamlanmoqda.
Ayniqsa, aholi va qurilish sohasi ehtiyojlariga mos zamonaviy mebel mahsulotlarini ishlab chiqarishga qaratilayotgan e’tibor natijadorlikni ta’minlamoqda. Bugungi kunda uy-joy qurilishi hajmlarining kengayishi ichki bozorda mebel mahsulotlariga bo‘lgan talabni sezilarli darajada oshirmoqda. Bu esa ishlab chiqaruvchilarni yangi quvvatlar ishga tushirish, assortimentni kengaytirish va sifatni oshirishga undamoqda.
Mutaxassislar ta’kidlashicha, tarmoqda mahalliy xomashyodan samarali foydalanish hamda zamonaviy texnologiyalarni joriy etish raqobatbardoshlikni ta’minlashda hal qiluvchi ahamiyat kasb etmoqda. Shu bilan birga, bu omillar mahsulot tannarxini pasaytirish va ichki bozorni import o‘rnini bosuvchi mahsulotlar bilan ta’minlash imkonini bermoqda.
Bugungi sharoitda mebel sanoati nafaqat ishlab chiqarish hajmlari o‘sishi, balki yangi ish o‘rinlari yaratish, tadbirkorlikni qo‘llab-quvvatlash va hududiy iqtisodiyotni diversifikatsiya qilishda ham muhim drayverga aylanmoqda. Jizzax viloyatida bu yo‘nalishda olib borilayotgan ishlar esa tarmoqning kelgusi o‘sishi uchun mustahkam zamin yaratadi.
Abdujalol Qayumov, O‘zA muxbiri
