Жей Ди Вэнс: Украинага ҳарбий ёрдам тўхтатилиши Трамп маъмуриятининг асосий ютуғидир
АҚШ томонидан Украинага бевосита қурол етказиб бериш тўхтатилиши қарори Трамп маъмуриятининг асосий ютуғи сифатида баҳоланмоқда. Шунингдек, Киевга ажратилган мислсиз маблағ тафтиш қилиниши кутиляпти.
АҚШ вице-президенти Жей Ди Вэнс Украинага бевосита қурол-яроқ етказиб беришни тўхтатиш ҳақидаги қарорни Трамп маъмуриятининг энг катта ютуқларидан бири деб атади. Унинг таъкидлашича, Вашингтон эндиликда Киев учун ҳарбий техника сотиб олиш ва жўнатиш амалиётидан воз кечган. Агар Европа давлатлари зарур деб топса, Украинани мустақил равишда қўллаб-қувватлашлари мумкин. Вэнснинг фикрича, молиялаштиришни тўхтатиш қарори бугунги кунда ўзини тўла оқламоқда. Бу ҳақда CNBC хабар бермоқда.
Бундан ташқари Президент Дональд Трамп аввалги маъмурият томонидан Украинага ажратилган маблағни синчиклаб текшириш зарурлигини таъкидламоқда. Америка етакчиси айтишича, Жо Байден даврида Киевга жами 350-400 миллиард доллар миқдорида ёрдам кўрсатилган.
Қолаверса, АҚШ раҳбари Украина Америка кўмагисиз узоқ вақт қаршилик кўрсата олмаслигига эътибор қаратиб, Қўшма Штатлар ушбу низога фаол жалб этилишини бевосита собиқ Президент Байденнинг нотўғри сиёсати билан боғлади.
Ф.Яхшибоева, ЎзА
