“Жаҳон чемпионати – 2026”: “E” гуруҳида Германия яққол фаворит
Хабарингиз бор, жорий йилги футбол бўйича Жаҳон чемпионатига АҚШ, Канада ва Мексика давлатлари мезбонлик қилади. Дунё футбол ихлосмандлари тўрт йилдан буён кутаётган мундиалда илк бор дунёнинг 48 та терма жамоаси иштирок этади. Биз анъанамизга мувофиқ, мундиалга йўл олган жамоаларнинг саралаш босқичларидаги иштирокини ёдга оламиз.
Бу гал эътиборимиз “E” гуруҳи иштирокчилари — Германия, Кюрасао, Кот-д’Ивуар, Эквадор терма жамоаларига қаратилди.
Аввало, гуруҳ етакчиси сифатида эътироф этилаётган, футбол оламида “Немис машинаси” дея ном қозонган Германия терма жамоаси ҳақида тўхталамиз. Ушбу жамоа Европа қитъаси саралаш босқичининг “А” гуруҳида Словакия, Шимолий Ирландия ҳамда Люксембург терма жамоаларига қарши баҳс олиб борди. Олти учрашувда 15 очко жамғарган германияликлар гуруҳда биринчи ўринни эгаллаб, ўз тарихида 21-маротаба Жаҳон чемпионати йўлланмасини қўлга киритди.
Мундиаллар тарихида жами 4 мартадан олтин, кумуш ва бронза медалларини қўлга киритган Германия бу йилги чемпионатда ҳам асосий фаворитлардан бири сифатида қаралмоқда. Мухлислар эса жамоанинг 2014 йилдан буён интиқлик билан кутилаётган навбатдаги жаҳон кубогини қўлга киритишидан умидвор. Бироқ, бу галги мундиал аввалгиларидан фарқли кечиши, рақобат эса ҳар қачонгидан ҳам кескин бўлиши кутилмоқда.
Эквадор терма жамоаси КОНМЕБОЛ томонидан ташкил этилган минтақавий саралаш босқичида иштирок этди. Ушбу саралаш баҳслари 2023 йил 7 сентябрдан 2025 йил 9 сентябрга қадар давом этди. Жамоалар 18 тур давомида Жаҳон чемпионати йўлланмаси учун кураш олиб борди. Якунда Эквадор 29 очко жамғариб, иккинчи ўрин соҳиби сифатида мундиалга йўл олди. Дарвоқе, бу улар учун тарихдаги бешинчи Жаҳон чемпионати бўлади.
Гуруҳнинг яна бир кучли жамоаларидан бири Кот-д’Ивуар Африка қитъаси саралаш босқичининг “F” гуруҳида иштирок этди. 2023 йилда старт олган саралаш баҳсларида кот-д’ивуарликлар 10 учрашувда 8 ғалаба ва 2 дуранг қайд этиб, 26 очко билан ўз тарихида тўртинчи марта Жаҳон чемпионати йўлланмасини нақд қилди.
Мазкур гуруҳдан ўрин олган Кюрасао терма жамоаси эса КОНКАКАФ саралашининг иккинчи босқичидан иштирокини бошлади. Жамоа “C” гуруҳида 12 очко тўплаб, биринчи ўринни эгаллади ҳамда ўз тарихида илк бор мундиал йўлланмасини қўлга киритди.
Шу тариқа, “E” гуруҳидан ўрин олган ҳар бир жамоа мундиалга ўзига хос ва машаққатли саралаш йўлини босиб ўтган ҳолда етиб келди. Германия ўзининг бой тажрибаси ва чемпионлик анъаналари билан ажралиб турса, Эквадор барқарор ўйини орқали яна бир бор Жанубий Америка футболи салоҳиятини намоён этди. Кот-д’Ивуар Африка футболидаги кучли рақобат шароитида ўз имкониятларини исботлаган бўлса, Кюрасао эса тарихий натижа қайд этиб, илк бор Жаҳон чемпионати иштирокчисига айланди.
Шу сабабли ҳам мазкур гуруҳдаги баҳслар нафақат мухлислар, балки футбол мутахассислари диққат-марказида бўлади. Турли қитъа ва футбол мактабларига мансуб жамоалар ўртасидаги тўқнашувлар эса “Жаҳон чемпионати – 2026”нинг энг қизиқарли учрашувларидан бирига айланиши кутилмоқда.
Маълумот учун, “E” гуруҳидан ўрин олган жамоалар иштирокидаги учрашувлар 14–25 июнь кунлари бўлиб ўтади:
14 июнь: Германия — Кюрасао
Стадион: “NRG Stadium”
14 июнь: Кот-д’Ивуар — Эквадор
Стадион: “Lincoln Financial Field”
20 июнь: Германия — Кот-д’Ивуар
Стадион: “BMO Field”
20 июнь: Эквадор — Кюрасао
Стадион: “Arrowhead Stadium”
25 июнь: Кюрасао — Кот-д’Ивуар
Стадион: “Lincoln Financial Field”
25 июнь: Эквадор — Германия
Стадион: “MetLife Stadium”
Жавоҳир Тошхўжаев, ЎзА
