Истиқболли халқаро ҳамкорлик йўлга қўйилди
Аграр соҳага замонавий тенденциялар ва инновацион технологияларни жорий қилиш, халқаро ҳамкорликни ривожлантириш, илғор мамлакатлар тажрибасини ўрганиш муҳим аҳамиятга эга.
Айни шу мақсадда Томорқа ер эгалари ва деҳқон хўжаликлари фаолиятини ривожлантириш ҳамда қишлоқ хўжалиги маҳсулотлари ишлаб чиқаришни кенгайтириш бўйича кенгаш раиси С.Аннакличев, “Туронбанк” АТБ раиси Ч.Мирзаев, “Uzagrostar xolding” директори Ф.Муҳиддинов ҳамда “Булунғур – Agro Star” директори М.Бозорбоев иштирокида Миср давлатига хизмат сафари ташкил этилди.
Картошка етиштиришнинг мини туганакдан тортиб, маҳсулотларни экспортга йўналтиришгача бўлган барча босқичи бўйича тажриба алмашиш сафар дастуридан ўрин эгаллаган.
Яқин ва доимий ҳамкорликни йўлга қўйиш мақсадида “EFC Plants Tissue Culture S.A.E.” компанияси ижрочи директори М.Салама билан меморандум ҳам имзоланди.
Қайд этиш керак, “EFC Plants Tissue Culture S.A.E.” – уруғлик картошка туганакларини тўқима культивация орқали ишлаб чиқарувчи Миср–Франция инновацион компаниясидир.
Меморандум томонлар ўртасида картошкачилик, уруғлик картошка етиштириш, in-vitro технологияларни жорий этиш, илмий-инновацион ҳамда экспорт фаолияти йўналишларида ўзаро манфаатли, узоқ муддатли ва стратегик ҳамкорликни йўлга қўйишга қаратилган.
Компания мамлакатимизга 250 мингта Hermes навли картошка мини туганакларини етказиб беради. Улар орқали Мисрнинг илғор тажрибалари асосида уруғлик картошкалар Ўзбекистонда етиштирилади. Хорижий компания ҳосил олингунча бўлган жараёнларга масъул сифатида 3 нафар илғор мутахассисини Ўзбекистонга юборади.
Бундан ташқари, мазкур ҳужжат уруғлик картошка етиштиришнинг тўлиқ циклини жорий этиш, ҳамкорликда мавжуд in-vitro лабораторияларни такомиллаштириш, Ўзбекистон–Миср қўшма корхонаси фаолияти йўлга қўйилишини ҳам ўз ичига олади.
Шунингдек, меморандумда Мисрда ишлаб чиқарилган маҳсулотларни Ўзбекистон орқали МДҲ давлатларига, Ўзбекистонда етиштирилган қишлоқ хўжалиги маҳсулотларини эса Миср орқали Африка давлатларига экспорт қилиш ҳам назарда тутилган.
Реклама ҳуқуқи асосида
ЎзА
