Испания бош вазири Трампга қарши кучларни бирлаштирмоқчи (+видео)
Испания бош вазири Педро Санчес Барселона шаҳрида дунё етакчиларини жамлаган икки кунлик форумни очди. Бу анжуманда асосан Трампнинг MAGA сиёсатига, яъни “АҚШни янада буюк қилайлик” ҳаракатига қарши фикрдаги раҳбарлар қатнашди, деб хабар қилди Euronews.
Педро Санчес халқаро майдонда Трампга қарши ҳаракатга етакчилик қилишга уриняпти, шу билан бирга у мамлакат ичида ҳуқуқий муаммоларга ҳам дуч келмоқда.
Испания раҳбари дунёда реакцион тўлқин кучайиб, нафрат, уруш ва бўлинишларни кучайтиряпти, деб огоҳлантирди. У Дональд Трамп номини тўғридан-тўғри айтмаган бўлса-да, танқидлар айнан унинг сиёсатига қаратилган эди.
«Улар қанча бақирмасин ёки қанча ёлғон тарқатмасин, ўта ўнгчи реакцион кучларнинг даври тугаяпти», — деди Санчес.
Бразилия президенти Лула да Силва ҳам бу фикрларни қўллаб-қувватлаб, ўзини ватанпарвар деб атаб, аммо мамлакат манфаатларини сотувга қўяётганларни танқид қилди.
Анжуманда ЖАР президенти Сирил Рамафоса, Колумбия президенти Густаво Петро ва Мексика президенти Клаудия Шейнбаум ҳам иштирок этди. Уларнинг барчаси Трамп билан тарифлар ва миграция масалаларида зиддиятга кирган.
Бу анжуманда Европадан ҳам бир қатор давлат вакиллари иштирок этган. Масалан, франциялик иқтисодчи Габриэль Цукман бойлар учун солиқни ошириш тарафдори сифатида нутқ сўзлади.
Испания бош вазирининг таъкидлашича, бу конференция прогрессив кучларни бирлаштиришга қаратилган. Қатнашчилар гарчи Трамп номини очиқ айтишмаса-да, унинг тарифлар, ташқи сиёсат ва урушларга оид қарорлари кескин танқид қилинди.
Миннесота губернатори Тим Уолз кўплаб қатнашчилар олдида Трампни куч ишлатишга мойил ва аниқ режаси йўқ сиёсатчи, деб баҳолади.
Бразилия президенти Лула да Силва эса Испаниянинг АҚШ ҳарбийларига ўз базаларидан Эронга зарба бериш учун фойдаланишга рухсат бермагани учун Санчесни жасорат кўрсатди, деб мақтади.
Шу билан бирга, Испания етакчисини қанчалик жасоратли деб мақташмасин, лекин мамлакати ичидаги вазият яхши эмас. Унинг рафиқаси Бегония Гомесга коррупция айбловлари қўйилган ва икки йиллик суриштирувлардан сўнг иш судга оширилган. Лекин, улар барча айбловларни рад этмоқда.
Қисқача айтганда, Санчес халқаро миқёсда ўзига сиёсий иттифоқчилар топишга ҳаракат қиляпти, аммо ички сиёсий ва ҳуқуқий босимлар ҳам кучайиб бормоқда.
<iframe width="640" height="420" src="https://www.youtube.com/embed/kBSC5oWDgtY" title="Ispaniya bosh vaziri Trampga qarshi kuchlarni birlashtirmoqchi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов (видео), ЎзА
