Самарқанд шаҳрида шу кунларда Мактабгача ва мактаб таълими вазирлиги томонидан “Турон” мактаб театри ҳамда “Иқтидор” мактаб ансамбли танловларининг республика босқичи ўтказилмоқда.

Жумладан, бугун “Нурафшон” санъат саройида “Иқтидор” мактаб ансамбли танловининг якуний босқичи ташкил этилди. Унда республикамизнинг барча ҳудудларидан 14 жамоа қатнашиб, миллий чолғу асбобларидан қай даражаси маҳорат билан фойдаланишини намоён қилди.

[gallery-23956]

Ўқувчи-ёшларнинг миллий мусиқа санъатига қизиқишларини ва чолғу асбобларидан фойдаланиш кўникмаларини ошириш, уларнинг бўш вақтини мазмунли ташкил этиш мақсадида ўтказилаётган мазкур танловда мактабларнинг 6-10 синф ўқувчилари саккиз нафардан жамоа бўлган ҳолда иштирок этишлари мумкин.  

Танловнинг туман (шаҳар) босқичи жорий йилнинг 7-11 апрель кунлари ўтказилиб, унда 8890 жамоа қатнашган бўлса, 14-29 апрель кунлари бўлиб ўтган ҳудудий босқичда  208 та жамоа мамлакат босқичи йўлланмаси учун курашди.  

Якуний босқичда жамоаларнинг чиқишларини юртимизнинг таниқли бастакор ва созандалари баҳолаб борди.  

“Турон” мактаб театри ҳамда “Иқтидор” мактаб ансамбли танловларининг республика босқичи ғолибларини тантанали тақдирлаш маросими бугун кечқурун Самарқанд халқаро туризм маркази “Боқий шаҳар” мажмуасида ўтказилади.

Ғ.Ҳасанов, А.Исроилов (сурат), ЎзА мухбирлари