Ҳурмуз бўғозида танкерга ҳужум: Теҳрон огоҳлантириши амалдами?

Ҳурмуз бўғозида ҳаракатланаётган танкер номаълум снаряд зарбасига учраб, ёнғин келиб чиққан. Бу ҳақда Буюк Британиянинг “United Kingdom Maritime Trade Operations” (UKMTO) маркази маълум қилди. Ҳодиса Ўмон соҳили яқинида содир бўлган.

Маълумотга кўра, жануб томон ҳаракатланаётган танкернинг чап қисмига снаряд теккан. Ёнғин тезда назоратга олинган, экипаж аъзолари жабрлангани ҳақида маълумот йўқ. Ҳодиса юзасидан текширув олиб борилмоқда.

Орадан кўп ўтмай, Эрон давлат телевидениеси ҳужумга учраган кема Қатардан суюлтирилган табиий газ олиб кетаётгани ва муайян огоҳлантиришга амал қилмагани айтилди. Бинобарин, расмий Теҳрон ҳужум учун жавобгарликни зиммасига олмаган.

Эслатиб ўтамиз, ўтган ҳафта Ислом Республикаси қўшма ҳарбий қўмондонлиги Ҳурмуз орқали ҳаракатланувчи ҳар қандай нефть ва газ танкери белгиланган йўналишдан фойдаланиши шартлигини билдирган. Расмий баёнотда қўйилган талабга риоя қилмаслик “кескин ва зудлик билан жавоб чораси кўрилиши”га сабаб бўлиши таъкидланган.

Мусулмон Зиё, ЎзА