Хорезмде инвесторлар мен кәсіпкерлердің ашық диалогы өтті
Өзбекстанда инвестициялық ахуалды жақсарту және кәсіпкерлікті қолдау бағытындағы ашық диалог алаңдары өңірлерде тұрақты түрде ұйымдастырылып келеді.
Хиуа қаласында Премьер-министрдің орынбасары Жамшид Худжаевтың жетекшілігімен инвестиция тарту, өнеркәсіпті дамыту және сауданы реттеу мәселелері жөніндегі Үкімет комиссиясының Хорезм облысының кәсіпкерлері мен инвесторларымен «ашық диалогы» өтті.
Еркін әрі ашық форматта өткен кездесуге Хорезм облысының әкімі Журабек Рахимов, Бас прокурордың орынбасары Дилмурод Қосимов, Президент жанындағы Кәсіпкерлік субъектілерінің құқықтары мен заңды мүдделерін қорғау жөніндегі уәкіл (бизнес-омбудсмен) Абдуманноп Буриев қатысып, кәсіпкерлердің сұрақтарына жауап берді.
Жиында ұсынылған мәліметтерге сәйкес, Хорезм облысында 2026 жылы жалпы құны 4,1 миллиард доллар болатын 83 жоба аясында 2,1 миллиард доллар көлемінде (салалар бойынша – 143 миллион, өңірлік жобалар бойынша – 2 миллиард доллар) шетелдік инвестициялар мен несиелерді игеру жоспарланған.
Биылғы қаңтар–маусым айларында 768 миллион доллар шетелдік инвестиция игеріліп, жоспар 143 пайызға орындалды. Бұл өткен жылдың сәйкес кезеңімен салыстырғанда 1,5 есе жоғары көрсеткіш.
Оның қатарында, салалық жобаларға 77,1 миллион доллар (жоспардың 145 пайызы, өсім – 2 есе), ал өңірлік жобаларға 691,3 миллион доллар (жоспардың 143 пайызы, өсім – 1,5 есе) бағытталған.
Соған қарамастан, кейбір салалардағы жекелеген жобалар бойынша жоспарлы көрсеткіштердің орындалмағаны атап өтілді.
Осыған байланысты Үкімет комиссиясы Хорезм облысындағы инвестициялық жобалардың жүзеге асырылу барысымен танысып, инвесторлар мен кәсіпкерлердің өзекті мәселелерін тікелей талқылау мақсатында осы кездесуді ұйымдастырды.
Кәсіпкерлерге жедел қолдау көрсету үшін диалогқа жауапты министрліктер мен ведомстволардың, дипломатиялық өкілдіктердің өкілдері қатысты. Кейбір қатысушылар онлайн форматта қосылды.
Кездесу барысында хорезмдік кәсіпкер экспорт рәсімдерін жеделдетудің жаңа тетігін ұсынды.
Атап айтқанда, «Шават» ауданындағы «ARTA TEX» жауапкершілігі шектеулі қоғамының директоры Наргиза Бекмуратова көптеген экспорттаушылар тап болып отырған мәселені көтерді.
– Компаниямыз тоқыма өнімдерін АҚШ, Ұлыбритания және Еуропа елдеріне тұрақты түрде экспорттайды. Алайда қажетті сараптама қорытындылары тек жұмыс күндері рәсімделетіндіктен, демалыс күндері экспорттық жөнелтілімдер іс жүзінде тоқтап қалады. Сондықтан сараптама қызметін сенбі-жексенбі күндері де ұйымдастыруды немесе рәсімдердің бір бөлігін онлайн форматқа көшіруді ұсынамын, – деді кәсіпкер.
Үкімет комиссиясы сараптама қызметінің демалыс күндері де жұмыс істеуін қамтамасыз ететін және экспорттық жүк жөнелтілімдеріндегі кідірістерді жоятын жаңа тетікті енгізу жөніндегі ұсынысты қолдады.
Бұл шешім экспорттаушы кәсіпорындардың жүйелі мәселелерін шешуге және экспорт үдерісінің тиімділігін арттыруға мүмкіндік береді деп күтілуде.
Кездесу қорытындысы бойынша министрліктердің, ведомстволардың, коммерциялық банктердің және жергілікті атқарушы органдардың басшыларына өңір кәсіпкерлерін жүйелі қолдау жұмыстарын күшейту тапсырылды.
