Хитой Тайвань билан алоқани тикламоқчи
Бу режа материк Хитой билан яқинлашишни қўллаб-қувватловчи Тайвань мухолиф сиёсатчисининг ташрифидан сўнг амалга оширилди.
Пекин Тайвань билан илгари тўхтатилган баъзи алоқалар, жумладан тўғридан-тўғри рейслар ва денгиз маҳсулотлари импортини тиклаш режасини эълон қилди. Хитой расмийлари оролда Коммунистик партия ва “Kuomintang” партияси ўртасида узоқ муддатли ҳамкорлик механизмини яратиш масаласи кўриб чиқилаётганини ҳам эълон қилган.
Бундан ташқари материкни Хитой қирғоғига яқин жойлашган Матсу ва Кинмен ороллари билан боғлайдиган кўприк қуриш лойиҳаси илгари суриляпти. Пекин мазкур ғоя анчадан бери муҳокама қилинаётганига урғу берган.
1949 йил бўлинган Хитой ва Тайвань ўртасидаги муносабат 2016 йил мустақиллик тарафдори, Демократик тараққиёт партиясидан сайланган Президент Цай Инг-вэнь орол етакчилигини қўлга киритгандан кейин ёмонлашган.
С.Раҳимов, ЎзА
