Ҳиндистон мусобақасида Жавоҳир Магнус Карлсен билан дуранг ўйнади
Ҳиндистоннинг Бангалор шаҳрида шахмат бўйича жамоалар ўртасида ўтаётган “Tech Mahindra Global Chess League” турнирининг ортда қолган кунида ҳамюртмиз Жавоҳир Синдоров жаҳоннинг энг кучли шахматчиси саналган Магнус Карлсен билан куч синашди.
Синдоров етакчилигидаги “FYERS American Gambits” жамоаси турнирнинг учинчи кунги баҳсида Магнус Карлсен сардорлигидаги "Alpine APL Pipers” жамоаси билан рўбарў келди.
Биринчи тахтада Жавоҳир Синдоров ва Магнус Карлсен ўртасидаги ўйинда томонлар муроса йўлини танланди. Шунингдек, Жавоҳирнинг жамоадошлари Бибисара Ассаубаева ҳиндистонлик Дивия Дешмуҳ билан, Ниҳал Сарин нидерландиялик Аниш Гири билан дурангга эришган вазиятда уларнинг қолган жамоадошлари рақибларига имкониятни бой берди. Бу ўз навбатида, Магнус Карлсен жамоаси 15:3 ҳисобида ғалаба қозонишини таъминлади.
Бугун, 8 сентябрь куни мукофот жамғармаси 1 миллион АҚШ долларидан иборат мазкур турнирнинг навбатдаги кунида жавоҳир Синдоровнинг “FYERS American Gambits” жамоаси Максим Ваше-Лаграв етакчилигидаги “CheQ Mumba Masters” ҳамда Вишванатан Ананд сардорлигидаги “PBG Alaskan Knights” жамоалари билан баҳс олиб боради.
Тўртинчи кунги ўйинлар остонасида турнир жадвалини 9 очкога эга "Alpine APL Pipers” жамоаси бошқариб турибди. Иккита ғалаба ва иккита мағлубиятга эга “FYERS American Gambits” ва “PBG Alaskan Knights” жамоалари 6 очко билан кейинги ўринларни банд этган.
Глобал шахмат лигаси тизимидаги мазкур турнир 12 сентябрга қадар давом этади.
Т.Рўзиев, ЎзА
