Ғиждувон — мустақиллик шукуҳи оғушида
Мустақиллигимизнинг 35 йиллик шодиёнаси тобора яқинлашар экан, юртимизнинг ҳар бир гўшасида байрам нафаси, янгиланиш ва бунёдкорлик руҳи тобора яққол намоён бўлмоқда. Бу улуғ санага тайёргарлик жараёни Бухоро вилоятининг тадбиркорлар юрти Ғиждувон туманида ҳам кўтаринки кайфият ва катта масъулият билан давом этмоқда.
Зеро, “Ягона Ватан, ягона халқ бўлиб, янги ҳаёт ва келажак яратамиз!” деган эзгу ғоя тумандаги бугунги бунёдкорлик ишларининг мазмун-моҳиятини тўла ифода этади.
Давлат раҳбари ташаббуси билан юртимизда маҳаллаларни обод қилиш, аҳоли учун муносиб турмуш шароитини яратиш, шаҳар ва қишлоқлар қиёфасини замонавийлаштириш, инсон қадрини улуғлашга қаратилган эзгу ишлар Ғиждувонда ҳам изчил давом этмоқда.
Айни кунларда туман кўчалари, маҳаллалар, корхона ва ташкилотлар ҳудудларида кенг кўламли ободонлаштириш ишлари олиб борилмоқда. Кўчалар тартибга келтирилиб, ҳудудлар янада кўркамлаштирилмоқда. Тунги ёритиш чироқлари ўрнатилиб, давлат байроқлари, ранг-баранг баннерлар ва байрамона шиорлар билан безатилаётган кўчаларга ўзгача файз кирмоқда.
Айниқса, кечки пайт Ғиждувон кўчаларидаги ёруғликлар, хилпираётган байроқлар ва байрамона безаклар туманга алоҳида кўрк бағишлайди. Гўёки ҳар бир кўча, ҳар бир маҳалла Мустақилликнинг 35 йиллик тўйини қарши олиш учун ўз либосини янгилаётгандек.
Ободлик — халқ кайфияти. Ободлик — инсонга бўлган эътибор. Ободлик — юртга бўлган меҳрнинг амалий ифодасидир.
Шу маънода, бугун Ғиждувонда амалга оширилаётган ҳар бир эзгу иш замирида инсон қадрини юксалтириш, маҳаллаларни янада обод ва фаровон масканларга айлантириш, одамларга муносиб шароит яратишдек улуғ мақсад мужассам.
Мустақиллик бизга нафақат эркин ва фаровон ҳаёт қуриш имконини, балки ўз тақдиримиз ва келажагимизни ўз қўлимиз билан бунёд этиш масъулиятини ҳам берди. Бугунги обод маҳаллалар, равон кўчалар, замонавий иншоотлар ва янгиланиб бораётган ҳудудлар ана шу имкониятларнинг ҳаётдаги ифодасидир.
Ғиждувон ҳам ана шу буюк янгиланишлар жараёнидан муносиб ўрин эгаллаб, йилдан-йилга ўзининг янги қиёфасини намоён этмоқда. Бир томонда тарихий анъаналар, бир томонда замонавий тараққиёт — бу икки уйғунлик туманнинг бетакрор қиёфасини яратмоқда.
Энг муҳими, Мустақиллик байрами олдиданги бу бунёдкорлик ишлари одамларда эртанги кунга ишонч ва юрт тақдирига дахлдорлик туйғуларини янада кучайтирмоқда.
Чунки бугун Ғиждувонда фақат кўчалар эмас, кўнгиллар ҳам обод бўлмоқда.
Мустақилликнинг 35 йиллиги — Ғиждувон учун шунчаки сана эмас. Бу — босиб ўтилган шарафли йўл, бугунги обод ҳаёт ва эртанги буюк мақсадларга назар ташлаш фурсати.
Ягона Ватан, ягона халқ бўлиб, янги ҳаёт ва келажак яратамиз!
Зариф Комилов, ЎзА мухбири
