Германияликлар шахсий автомобиллардан воз кечмоқчи
Иқтисодий кўрсатгич ва тарифларни таққослаш бўйича йирик провайдерлардан бири – “Verivox” буюртмасига асосан ўтказилган сўровномада иштирок этганларнинг 48 фоизи шундай фикр билдирган.
Натижаларга кўра, немисларнинг 29 фоизи ўлкада бензин нархи қимматлиги сабаб машинадан велосипедга, 24 фоизи эса жамоат транспортига ўтган. Респондентларнинг учдан икки қисми (67%) энергия нархлари кўтарилгани боис уни тежашга кўпроқ эътибор қарата бошлаганини айтган.
Энг кўп тарқалган чора – ишлатилмаётган электр жиҳозларини “кутиш” режимида қолдирмай, бутунлай ўчириб қўйишдир. Сўровда қатнашганларнинг 55 фоизи иситиш тизимини пасайтирганини, 47 фоизи эса иссиқ сувни тежаётганини маълум қилган.
Шу билан бирга, 27 фоиз иштирокчи энергияни тежамаётганини қайд этган. Бунинг асосий сабаби сифатида улар аввал ҳам тежамкор яшаганликлари ва эндиликда қўшимча қисқартиришлар учун имконият кўрмаётганликларини таъкидлаган.
Ў.Алимов, ЎзА
