Германия темир йўл бекатларида спиртли ичимликлар ичиш тақиқланди
ГФРнинг миллий темир йўл компанияси - “Deutsche Bahn” мамлакат бўйлаб жойлашган 5 мингдан ортиқ темир йўл бекатида спиртли ичимликлар истеъмол қилишни тақиқлашга қарор қилди. Янги тартиб босқичма-босқич жорий этилади ва 15 октябрга қадар барча бекатларни қамраб олади.
Ҳозиргача Кёльн, Гамбург ва Мюнхен каби шаҳарлардаги 30 та бекатда ушбу қоида кучга кирган. Сентябр ойидан Берлин марказий вокзали ва бошқа йирик бекатларда ҳам тақиқ жорий этилади. Кейинчалик бу тартиб бутун мамлакат бўйлаб амал қилади.
Компания раҳбари Эвелин Палла сўнгги йилларда спиртли ичимликлар истеъмоли зўравонлик ҳолатларининг ортишига сабаб бўлаётганини таъкидлади. Унинг сўзларига кўра, яқинда маст йўловчи чипта текшируви вақтида хавфсизлик ходимини калтаклаб, уни ҳаракатланаётган поезд эшигидан йиқилишига сабаб бўлган. Оқибатда ходим жиддий тан жароҳати олган.
Янги қоидани бузганлар вокзал ҳудудидан чиқариб юборилади, талабни такроран бузувчиларга эса бу жойларга доимий кириш тақиқланиши мумкин. Бироқ ёпиқ идишдаги спиртли ичимликларни юк ёки харид халталарида олиб юришга рухсат берилади. Шунингдек, чеклов поездлар ичига татбиқ этилмайди.
Мусулмон Зиё, ЎзА
