Фарғоналик спортчилар республика босқичига шай
Фарғона вилояти ҳокими Хайрулло Бозоров «Президент олимпиадаси» мусобақасининг республика босқичига йўлланма олган ёш спортчилар билан учрашди. Пайшанба — «Ёшлар куни» доирасида ташкил этилган мулоқотда спортчиларнинг ютуқлари, келгуси режалари ва мусобақага тайёргарлик жараёнлари муҳокама қилинди.
Учрашув давомида вилоят ҳокими ёш спортчиларнинг фикр ва таклифларини тинглаб, улар учун яратилаётган шароитлар, спортни янада ривожлантириш ва юқори натижаларга эришиш масалаларига эътибор қаратди.
Мулоқотда юнон-рум курашчиси Абдурауф Абдумажидов, волейбол бўйича икки карра Ўзбекистон чемпиони, миллий терма жамоа аъзоси Исфандиёр Обидалиев ҳамда боксчи Оғабек Асқаралиев сўзга чиқиб, ёш спортчиларга қаратилаётган эътибор ва яратилаётган имкониятлар учун миннатдорлик билдирди. Шунингдек, спорт соҳасини ривожлантириш юзасидан ўз таклифларини илгари сурди.
Жорий йилда «Янги Ўзбекистон Олимпия чўққилари» мусобақалари доирасида Фарғона вилоятидан 21 та спорт тури бўйича 26 минг 993 нафар спортчи рўйхатдан ўтган.
«Президент олимпиадаси»нинг республика босқичида вилоят шарафини ҳимоя қилиш учун 360 нафардан иборат делегация иштирок этиши режалаштирилган. Уларнинг 255 нафари спортчи бўлиб, шундан 125 нафари қизлардир. Делегация таркибидан 95 нафар мураббий ва 10 нафар масъул вакил ҳам ўрин олган. Шунингдек, мусобақаларда вилоятдан 33 нафар параспортчи қатнашиши кутилмоқда.
[gallery-32113]
Учрашув якунида вилоят ҳокими ёш спортчиларга республика босқичида муносиб иштирок этиш, юқори натижаларга эришиш ва вилоят шарафини муносиб ҳимоя қилишда омад тилади.
Муқимжон ҚОДИРОВ (сурат), ЎзА
