Эрон терма жамоаси АҚШга фақат ўйин кунлари киритилади
АҚШда бўлиб ўтадиган футбол бўйича жаҳон чемпионати олдидан Эрон терма жамоаси яна бир жиддий муаммога дуч келди. Уларнинг мамлакатга кириши ва чиқиши учун ноодатий чеклов қўйилган.
Эроннинг Мексикадаги элчиси Абулфазл Пасандидеҳнинг сўзларига кўра, миллий терма жамоаси аъзоларига Қўшма Штатлар ҳудудига фақат ўйин ўтказиладиган кунлари киришга рухсат берилган. Шунингдек, улар учрашув якунлангандан кейин ўша куннинг ўзидаёқ мамлакатни тарк этиши шарт. АҚШ, Мексика ва Канада бирга мезбонлик қилаётган бу йилги мундиал 11 июнь куни бошланади. Эрон жамоаси гуруҳ босқичидаги барча уч ўйинни Қўшма Штатлар майдонларида ўтказиши керак. ФИФА (FIFA) ушбу ўйинларни Мексикага кўчириш ҳақидаги таклифни рад этган.
24 май куни ФИФА Эроннинг жаҳон чемпионати давридаги қароргоҳини Аризона штатидан Мексиканинг Тихуана шаҳрига кўчириш ҳақидаги қарорини маъқуллаган. Бунга сиёсий вазият кескинлашгани, виза расмийлаштириш жараёни қийинлашгани сабаб бўлган.
Ф.Яхшибоева, ЎзА
