Электр таъминотидаги муаммолар жойида ҳал этилмоқда
Тадбиркорлик субъектларининг мурожаатларини жойида ўрганиш ва мавжуд муаммоларга амалий ечим топиш мақсадида Наманган вилоятида навбатдаги сайёр қабул ўтказилди.
“Ўзэнергоинспекция” ва Бизнес-омбудсман девонининг Наманган ҳудудий бошқармаси ҳамкорлигида ташкил этилган сайёр қабул давомида тадбиркорларнинг электр энергияси таъминоти билан боғлиқ мурожаатлари атрофлича кўриб чиқилди.
Хусусан, Янги Наманган туманида фаолият юритаётган “Doctor family” МЧЖ ва “Nurli tola savdo sanoat” МЧЖ вакилларининг мурожаатлари жойига чиққан ҳолда ўрганилиб, электр таъминотида юзага келган муаммолар ижобий ҳал этилди.
Шунингдек, сайёр қабул жараёнида жами 12 та мурожаат ишчи гуруҳ томонидан тезкорлик билан кўриб чиқилди. Ҳар бир ҳолат бўйича масъул ташкилот ва корхоналар вакилларига тегишли кўрсатмалар берилди.
Мурожаатчиларга эса мавжуд масалалар юзасидан ҳуқуқий тушунтиришлар берилиб, уларнинг қонуний манфаатларини таъминлаш бўйича зарур чоралар белгиланди.
Инспекция ахборот хизматига кўра, бундай сайёр қабуллар тадбиркорларнинг муаммоларини жойида ўрганиш, уларга амалий ёрдам кўрсатиш ва масалаларни тезкор ҳал этишда муҳим аҳамият касб этмоқда.
Н.Зиёдуллаева, ЎзА
