ЕЧЛ: «Манчестер Сити» ва «Реал»дан иродали ғалаба, «Комо»дан тарихий натижа

Европа чемпионлар лигасининг ушбу тури ўзбекистонлик футбол мухлислари учун ҳам алоҳида аҳамият касб этди. Сабаби, нуфузли мусобақанинг кечаги баҳсларида икки нафар ҳамюртимиз — Абдуқодир Ҳусанов «Манчестер Сити», Умарали Раҳмоналиев эса «Сабаҳ» клуби сафида майдонга тушди.

Лейпцигдаги «Ред Булл Арена»да кечган учрашувда «Манчестер Сити» қийин ғалабага эришди. Биринчи бўлимнинг 37-дақиқасида Кастелло Люкебанинг ўз дарвозасига киритган тўпи меҳмонларни олдинга олиб чиқди.

Танаффусдан кейин мезбонлар фаоллашди. 49-дақиқада Ридле Баку ҳисобни тенглаштирди. Бироқ, 58-дақиқада Энцо Фернандес бош билан аниқ зарба бериб, «МС» клубини яна олдинга олиб чиқди. Орадан уч дақиқа ўтиб, Антонио Нуса яна мувозанатни тиклади. Учрашув тақдирини 78-дақиқада Эрлинг Ҳоланд ҳал қилди. Эллиот Андерсоннинг узатмасидан кейин норвегиялик ҳужумчи ғалаба голини киритди.

Ўзбекистон миллий терма жамоаси ҳимоячиси Абдуқодир Ҳусанов «Манчестер Сити»нинг асосий таркибида майдонга тушиб, тўлиқ 90 дақиқа ҳаракат қилди. У қўшиб берилган вақтнинг 94-дақиқасида сариқ карточка билан огоҳлантирилди. Ҳимоячимиз учрашув давомида тўртта тўпни рақибдан олиб қўйишга муваффақ бўлди. “Sofascore” портали унинг ҳаракатларини 7,0 баллга баҳолади.

«Викинг» — «Сабаҳ» 4:1

Норвегиядаги учрашувда Умарали Раҳмоналиев «Сабаҳ»нинг асосий таркибида майдонга тушиб, 79 дақиқа ҳаракат қилди. Ҳамюртимиз 11-дақиқада Патрик Орфе Мбина томонидан киритилган голга ҳаммуаллиф бўлди. “Sofascore” портали футболчимизнинг ўйинини 7,0 баллга баҳолади. Бироқ мезбонлар 27-дақиқада Эрик Ботҳеймнинг голи билан мувозанатни тиклади.

Иккинчи бўлимда Златко Трипич, Ҳенрик Фалхенер ва Эрик Ботҳейм рақиб дарвозасини ишғол қилиб, «Викинг»нинг 4:1 ҳисобидаги ғалабасини таъминлади.

«Фенербаҳче» — «Ливерпуль» 3:2

Истанбулдаги «Шюкрю Саражоғлу» стадионида кечган ўйин «Ливерпуль» учун омадсиз якунланди. Баҳснинг 25-дақиқасида Трей Ньони меҳмонларнинг биринчи голини урди. Тўрт дақиқа ўтиб, Мейсон Гринвуд ҳисобни тенглаштирди.

Иккинчи бўлимда захирадан майдонга тушган Александр Исак 69-дақиқада «Ливерпуль»ни яна олдинга олиб чиқди. Аммо мезбонлар бунга ҳам муносиб жавоб қайтарди. 73-дақиқада Арчи Браун ҳисобни тенглаштирган бўлса, орадан олти дақиқа ўтиб Ведат Мурики ғалаба голини киритди.

АЕК — «Реал Мадрид» 2:3

Афинадаги учрашувда «Реал Мадрид» икки марта ҳисобда ортда қолганига қарамай, якунда иродали ғалабани нишонлади. Ўйиннинг 12-дақиқасида Абубакари Койта мезбонларни олдинга олиб чиқди. 32-дақиқада Жуд Беллингем ҳисобни тенглаштирди. Иккинчи бўлимда Ставрос Пилиос 75-дақиқада АЕК клубининг иккинчи голига муаллифлик қилди. Аммо уч дақиқа ўтиб, Килиан Мбаппе мувозанатни тиклади.

Учрашувнинг 90+2-дақиқасида Федерико Вальверде Браим Диаснинг узатмасидан кейин аниқ зарба йўллаб, мадридликларга ғалабани тақдим этди. Қўшимча вақтнинг сўнгги дақиқаларида АЕК муаллифи Абубакари Койта қизил карточка ҳам олди.

Эътиборлиси, «Қироллик клуби» ушбу ғалаба орқали умумий босқичдаги тўртта учрашувнинг барчасида ғалаба қозониб, 12 очко тўплади.

«Ланс» — «Комо» 1:9

Сеск Фабрегас бошқараётган Италиянинг «Комо» жамоаси сафарда «Ланс» дарвозасига тўққизта тўп киритиб, йирик ғалабани қўлга киритди.

Учрашувда меҳмонлар ҳужумчиси Анастасиос Дувикас хет-трик қайд этди. У 7, 32 ва 57-дақиқаларда рақиб дарвозасини ишғол қилди. Шунингдек, Нико Паз, Лукас да Кунья, Марк-Оливер Кемпф, Маттия Либерали, Мартин Батурина ва Маттео Папачолли ҳам голлар муаллифи бўлди.

Мезбонларнинг ягона голини 65-дақиқада Рубен Агилар киритди.

Қайд этиш жоиз, «Комо»нинг 9:1 ҳисобидаги ғалабаси Чемпионлар лигаси тарихидаги энг йирик ғалабалардан бири бўлди. Италияликлар ушбу натижа билан мусобақадаги энг катта ҳисобдаги ғалабалар рекордини такрорлади.

Маълумот учун, аввалги рекорд 2007 йил 6 ноябрда қайд этилган. Ўшанда «Ливерпуль» ўз майдонида Туркиянинг «Бешиктош» клубини 8:0 ҳисобида мағлуб этган. 2015 йил 8 декабрда эса «Реал Мадрид» ҳам «Мальмё»ни 8:0 ҳисобида енгиб, ушбу натижани такрорлаган.

Бундан ташқари, «Комо» мусобақа тарихида бир ўйинда тўққизта гол урган иккинчи жамоага айланди. Биринчи бўлиб бу натижага 2024 йилда «Бавария» «Динамо Загреб»ни 9:2 ҳисобида мағлуб этганида эришган.

«Боруссия Дортмунд» — «Реал Бетис» 2:1

Дортмунддаги «Сигнал Идуна Парк» стадионида кечган баҳсда мезбонлар уч очкога эга чиқди. Ўйининг биринчи бўлимида ҳисоб очилмади. Танаффусдан кейин Фабио Силва 49-дақиқада «Боруссия»ни олдинга олиб чиқди. 67-дақиқада Айтор Руибал ҳисобни тенглаштирди. Бироқ, орадан беш дақиқа ўтиб, Константинос Каретсас Фабио Силванинг узатмасидан кейин ғалаба голини киритди. Шу тариқа, дортмундликлар умумий босқичдаги учинчи ғалабасини нишонлади.

«Порту» — «Наполи» 4:1

Португалияда ўтган мазкур тўқнашувнинг 11-дақиқада Ян Беднарек ҳисобни очди. Биринчи бўлим якунига яқин Скотт Мактоминей мувозанатни тиклади.

Иккинчи бўлимда «Порту» ташаббусни тўлиқ ўз қўлига олди. 71-дақиқада Габри Вейга, 80-дақиқада Якуб Кивиор рақиб дарвозасини ишғол қилди. 90-дақиқада эса Саму пенальтидан унумли фойдаланиб, учрашувнинг якуний ҳисобини ўрнатди.

«ПСВ» — «Брюгге» 1:2

Эйндховендаги баҳсда «Брюгге» меҳмондан муҳим ғалаба билан қайтди. 25-дақиқада Николо Тресольди ҳисобни очди. Иккинчи бўлим бошида Кодай Сано мувозанатни тиклаган бўлса-да, 65-дақиқада Карлос Форбс меҳмонларга ғалабани тақдим этган голни киритди.

«Славия Прага» — «Арсенал» 1:2

Прага шаҳрида меҳмон бўлган Лондоннинг «Арсенал» клуби биринчи бўлимдаёқ икки гол фарқи билан олдинга чиқди. 9-дақиқада Нони Мадуэке ҳисобни очди. 38-дақиқада Виктор Дьёкереш меҳмонларнинг иккинчи голини киритди.

Учрашувнинг 90-дақиқасида Виктор Новак битта гол уриб, ҳисобдаги фарқни қисқартирди. Аммо мезбонлар қолган вақтдан унумли фойдалана олмади.

Шу тариқа, УЕФА Чемпионлар лигаси умумий босқичининг тўртинчи туридан кейин Парижнинг «ПСЖ» ва Испаниянинг «Реал Мадрид» клублари мусобақада максимал натижа қайд этмоқда. Ҳар икки жамоа тўртта учрашувнинг барчасида ғалаба қозониб, 12 очкодан жамғарган. Тўплар нисбатига кўра, «ПСЖ» биринчи, «Реал» эса иккинчи ўринда бормоқда.

Лондоннинг «Арсенал» клуби 10 очко билан учинчи поғонадан жой олган. Кейинги ўринларда «Комо», «Барселона», «Астон Вилла», «Манчестер Сити», «Ливерпуль», «Брюгге», «Спортинг», «Бетис» ва «Боруссия Дортмунд» жамоалари 9 очкодан жамғарган ҳолда қайд этилган. 13-поғонада 8 очко тўплаган «Бавария» жойлашган. «Штутгарт» 7 очко билан 14-ўринда бормоқда. «Интер», «ЛАСК», «Манчестер Юнайтед» ва «Галатасарой» эса 6 очкодан жамғарган.

Жадвалнинг 19-ўрнини «Фенербаҳче» 5 очко билан банд этган бўлса, 4 очкодан тўплаган бешта жамоа — «Рома», «Шахтёр», «Викинг», «Атлетико», «ПСВ» ва «Будё-Глимт» 20–25-ўринларга тақсимланган.

Турнир жадвалининг 26-33 ўринларида ҳисобида 3 очко бўлган «Порту», «Наполи», «Вильярреал», «РБ Лейпциг», АЕК, «Сабаҳ», «Фейеноорд» ва «Ланс» клублари жой олган. Жадвалнинг қуйи қисмида «Славия Прага» ва «Лилль» бир очкодан тўплаб, мос равишда 34 ва 35-ўринларни банд этган. «Слован Братислава» эса тўртта учрашувда ҳам мағлубиятга учраб, очкосиз ҳолда сўнгги, 36-ўринда бормоқда.

Маълумот учун, умумий босқич якунида дастлабки 8 та жамоа тўғридан-тўғри 1/8 финалга йўлланма олади. 9–24-ўринларни эгаллаган клублар плей-офф саралаш босқичида иштирок этади. Қолган жамоалар мусобақани тарк этади.

Европа чемпионлар лигаси умумий босқичининг 5-тур учрашувлари 24-25 ноябрь кунлари бўлиб ўтади. Унда қуйидаги баҳсларга гувоҳ бўламиз:

24 ноябрь:

22:45 — «Галатасарой» — «Астон Вилла», «Будё-Глимт» — «ЛАСК»;

01:00 — «Фейеноорд» — «Порту», «Арсенал» — «Боруссия Дортмунд», «Слован Братислава» — «Бетис», «Реал Мадрид» — «ПСВ», «РБ Лейпциг» — «Ланс», «Комо» — АЕК, «Манчестер Сити» — «Наполи»;

25 ноябрь:

22:45 — «Славия Прага» — «Вильярреал» ва «Сабаҳ» — «Барселона»;

01:00 — «ПСЖ» — «Рома», «Шахтёр» — «Фенербаҳче», «Интер» — «Штутгарт», «Спортинг» — «Манчестер Юнайтед», «Атлетико» — «Викинг», «Лилль» — «Бавария» ва «Брюгге» — «Ливерпуль».

Жавоҳир Тошхўжаев,

ЎзА