Давлат сиёсати ва бошқаруви академияси халқаро рeйтингдан ўрин олди
Ўзбекистон Республикаси Президенти ҳузуридаги Давлат сиёсати ва бошқаруви академияси илк маротаба “UI GreenMetric World University Rankings-2026” халқаро рейтингида иштирок этиб, 672-ўринни эгаллади ва дунёнинг рейтингдан ўрин олган 2,2 мингдан ортиқ олий таълим муассасалари қаторидан жой олди.
“UI GreenMetric World University Rankings” олий таълим муассасаларининг барқарор ривожланиш соҳасидаги фаолиятини комплекс баҳоловчи халқаро рейтинглардан бири бўлиб, унда экологик барқарорлик билан бир қаторда энергия ва иқлим, чиқиндиларни бошқариш, сув ресурслари, транспорт, таълим ва тадқиқот, бошқарув ҳамда рақамлаштириш каби йўналишлар ҳам инобатга олинади.
Академия рейтингнинг Governance and Digitalization йўналишида 675 балл қайд этди. Мазкур кўрсаткич бошқарув жараёнларини такомиллаштириш, рақамли трансформацияни ривожлантириш ва замонавий бошқарув ёндашувларини институционал фаолиятга жорий этиш борасидаги ишларни халқаро мезонлар асосида намоён этади.
Education and Research йўналишида Академия 800 балл натижани қайд этди. Бу кўрсаткич таълим ва илмий-тадқиқот фаолиятининг барқарор ривожланиш кун тартиби билан уйғунлигини ифодаловчи муҳим индикаторлардан биридир.
Академиянинг мазкур рейтингда илк маротаба иштирок этиши халқаро рейтинглар билан ишлашнинг янги босқичини бошлаб бермоқда. Рейтингда иштирок этиш жараёни Академиянинг мавжуд фаолиятини халқаро индикаторлар асосида таҳлил қилиш, кучли жиҳатларни аниқлаш ва ривожлантириш талаб этиладиган йўналишларни белгилаш учун ҳам муҳим институционал механизм бўлиб хизмат қилади.
Бугунги кунда барқарор ривожланиш масалалари нафақат экологик сиёсат, балки замонавий давлат бошқаруви, инсон капиталини ривожлантириш, рақамли трансформация, илмий-тадқиқот ва институционал самарадорлик билан чамбарчас боғлиқ.
Шу нуқтаи назардан, Академиянинг халқаро рейтингда қайд этган илк натижаси унинг таълим ва илмий-тадқиқот фаолиятини глобал барқарор ривожланиш кун тартиби билан уйғунлаштириш, халқаро академик ҳамкорликни кенгайтириш ва институционал салоҳиятини изчил ривожлантириш йўлидаги муҳим қадамдир.
Н.Абдураимова,
ЎзА
