Цифрлық білім беру саласында Өзбекстан мен Финляндия ынтымақтастығы кеңейіп келеді

Білім беру – қоғамның зияткерлік әлеуетін арттырып, елдің тұрақты дамуына негіз қалайтын маңызды сала. Кейінгі жылдары Өзбекстанда цифрлық білім беру мен адам капиталын дамыту бағытындағы атқарылып жатқан халықаралық ынтымақтастық өз тиімділігін көрсетіп келеді.

Цифрлық технологиялар министрі Шерзод Шерматов Финляндия Ұлттық білім агенттігінің өкілдерімен кездесу өткізді. Бұл туралы Цифрлық технологиялар министрлігі хабарлады.

Онда кәсіптік және кәсіби даму, STEAM және инклюзивті білім беруді дамыту, информатика пәні мұғалімдерінің цифрлық дағдыларын жетілдіру бағытындағы ынтымақтастық мәселелеріне ерекше назар аударылды.

Тараптар Финляндияның заманауи білім беру тәжірибесі негізінде цифрлық білім беру әдістемесін енгізу, оқу бағдарламаларын жетілдіру және педагогтердің біліктілігін арттыру бойынша бірлескен бастамаларды жүзеге асыру мүмкіндіктерін талқылады.

Кездесу барысында студенттер мен педагогтер алмасу бағдарламаларын іске қосу, цифрлық білім беру саласындағы ортақ жобаларды жүзеге асыру және оқу үдерісіне инновациялық технологияларды кеңінен енгізу мәселелері жөнінде пікір алмасылды. 

Келіссөздер барысында Финляндияның білім беру жүйесіндегі озық тәжірибелерді Өзбекстанда жүзеге асырылып жатқан цифрлық білім беру жобаларына енгізу перспективалары да қарастырылды.

Министрлік мәліметінше, кездесу соңында Цифрлық білім беруді дамыту орталығы мен Финляндия Ұлттық білім агенттігі арасында ынтымақтастық туралы хаттамаға қол қойылды.

Мұндай халықаралық әріптестік жастардың заманауи технологияларды меңгеруіне және бәсекеге қабілетті маман болып қалыптасуына үлкен мүмкіндік береді. Сонымен қатар, цифрлық білім беру саласындағы тәжірибе алмасу екі ел арасындағы ғылыми-инновациялық байланысты одан әрі нығайта түспек.