Чорвачилик соҳасида Покистон билан ҳамкорлик
Қорақалпоғистон Республикаси Вазирлар Кенгаши раиси Фарҳод Эрманов покистонлик инвесторлар билан учрашди.
Унда Оролбўйида чорвачилик соҳасини ривожлантириш, инвестиция лойиҳаларини амалга ошириш ҳамда ўзаро манфаатли ҳамкорлик алоқаларини йўлга қўйиш масалалари муҳокама қилинди.
Учрашувда қиймати 500 минг АҚШ долларини ташкил этувчи босқичма-босқич инвестиция дастурини амалга ошириш имкониятлари кўриб чиқилди. Шу билан бирга, Покистондан музлатилган ҳалол мол гўштини етказиб бериш бўйича маҳаллий импортчилар ва салоҳиятли ҳамкорлар билан музокаралар ўтказиш режалаштирилган.
Делегация вакиллари Нукус шаҳридаги совутгичли омборхоналар фаолияти билан танишиш, 100 тонналик совутгичли омборхона ташкил этиш ҳамда Нукус халқаро аэропортидаги “яшил йўлак” имкониятларидан фойдаланиш масалалари муҳокама қилинди. Шунингдек, дастлабки босқичда 25 бош қорамолни қамраб оладиган пилот лойиҳани йўлга қўйиш бўйича музокаралар олиб борилди. Бунда чорвачилик учун зарур яйловлар, озуқа базаси, ер майдони ажратиш ҳамда ветеринария хизматини ташкил этиш имкониятлари ўрганилиши кўзда тутилган.
Мазкур ташриф Қорақалпоғистон Республикасида чорвачилик тармоғини ривожлантириш, хорижий инвестицияларни жалб қилиш, озиқ-овқат таъминоти ва экспорт-импорт инфратузилмасини такомиллаштириш йўлидаги муҳим қадамлардан бири бўлиши мумкин.
Хорижий инвесторлар билан бундай мулоқотлар ҳудуднинг иқтисодий салоҳиятини кенг намоён этиш, янги ҳамкорлик алоқаларининг сақланишида ва истиқболли инвестиция лойиҳаларини амалга ошириш учун кенг имконият яратади.
Довуд Абибуллаев,
ЎзА мухбири
