Чехия Бош вазири: “Ўзбекистонга келганимдан мамнунман – ажойиб мамлакат, яхши инсонлар” (+видео)
Эксклюзив интервью
Чехия Республикаси Бош вазири Андрей Бабиш 29-30 апрель кунлари расмий ташриф билан мамлакатимизда бўлди.
Олий мартабали меҳмон самарали музокараларга бой бўлган ташриф якунида якунида журналистларга интервью берди.
– Чехия компаниялари Ўзбекистон билан қўшма корхоналар ташкил этишдан жуда манфаатдор, – деди Чехия Бош вазири. – Ўйлайманки, бу самарали ҳамкорликнинг бошланиши. Ўзбекистонга илгарироқ кела олмаганимдан жуда афсусдаман. Биласизми, мен биринчи марта 2019 йилда Бош вазир бўлган эдим, аммо икки йил давом этган COVID сабабли вақт йўқотдик, лекин мана яна ҳамкорликни мустаҳкамлаб, натижали ишларни давом эттиришга киришдик.
Биз, албатта, ривожланиш йўлида ҳамкорликка тайёрмиз. Президентингизнинг барча мақсад ва салоҳияти акс этган, ҳамкорлик йўналишлари тасвирланган китобини ўқиб чиқдик.
Ўзбекистонга келганимдан, юртингизда бўлганимдан мамнунман – ажойиб мамлакат, яхши инсонлар. Мен учун бу муваффақиятли ташриф бўлди. Юртингизда ҳайратланарли ўсиш суръатлари кузатилмоқда. Ташқи қарз миқдори пастлиги ва захираларингизни кўплиги ижобий ўсишларга сабаб бўлади. Мамлакатингиз ўз компанияларини хомашёдан қўшилган қийматга эга тайёр маҳсулотга айлантиришга ундаяпти. Бу самарали стратегиядир.
Андрей Бабиш ташриф доирасидаги мулоқотлар ўзаро ишонч руҳида ўтганини таъкидлади. Эришилган келишувлар икки давлат иқтисодий алоқаларини сифат жиҳатидан янги босқичга олиб чиқишини алоҳида эътироф этди. Юртимизнинг бой маданий мероси ва замонавий тараққиёт суръатлари унда катта таассурот қолдирганини таъкидлади. Ўзбек халқига хос бўлган самимий меҳмондўстлик ва кўрсатилган юксак эҳтиром учун чуқур миннатдорлигини билдирди.
<iframe width="650" height="420" src="https://www.youtube.com/embed/5aGAypmuZm4" title="Chexiya Bosh vaziri: “O`zbekistonga kelganimdan mamnunman — ajoyib mamlakat, yaxshi insonlar”" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Абдулазиз РУСТАМОВ, Носиржон ҲАЙДАРОВ (сурат), Ёқубжон МЕЛИБАЕВ (видео), ЎзА
