Чавандозлар тулпорларида "рақс" тушди
Пойтахтимиздаги "Universal Horses Stable" мажмуасида от йўрттириш йўналиши бўйича "FEI Dressage World Challenge 2026" халқаро мусобақаси якунига етди.
Мазкур мусобақада чавандозлар бешта дастур бўйича баҳсларда иштирок этди. Жумладан, “Senior I” дастурида Мария Гафурова (Empty G) биринчи ўринни эгаллаган бўлса, Лазиза Каримова (Ashton Valley) иккинчи, Наэрин Толипова (Hello Sensey) учинчи поғонадан жой олди. “Senior II” дастурида Евдокия Кемалова (Eltino G) барча рақибларини ортда қолдирди. Кучли учликдан Камила Салимова (Contender G) ва Яна Павлива (Verdana Gut G) жой олди.
“Youth” дастурида Суғдиёна Аҳмедова (Ashton Valley), Сагдиана Шаймарданова (Beniamino Di Fortuna) ва Мумтозбегим Абдураҳмонова (Brabus) шоҳсупага кўтарилди.
“Intermediate I” дастурида Феруза Абдуллаева “Passaj” номли тулпорида олтин медални қўлга киритди. Феликс Нуритдинов “Beniamino Di Fortuna” лақабли отида кумуш, Айлин Абдуллаева “Alon-Shael” оти билан бронза медалига эга чиқди. “Prix St-Georges” дастурида Алина Шевцова (Emerald) шоҳсупанинг энг юқори поғонасидан жой олди. Ума София Бутовенко (Monschof’s Red Diamond) иккинчи, Айлин Абдуллаева (Sanhit Hellas) учинчи бўлди.
Дарвоқе, 7–8 ноябрь кунлари пойтахтимиздаги “Universal Horses Stable” мажмуасида от спортининг тўсиқлардан сакраш (конкур) йўналиши бўйича “FEI Jumping World Challenge” халқаро мусобақаси бўлиб ўтади.
Жавоҳир Тошхўжаев,
ЎзА
