Бішкекте Өзбекстан – Қырғызстан сарапшылар кеңесінің отырысы өтті
Қырғызстан астанасы Бішкек қаласында «Өзбекстан мен Қырғызстан: стратегиялық серіктестік және оны одан әрі дамытудың перспективалары» тақырыбында Өзбекстан – Қырғызстан сарапшылар кеңесінің екінші отырысы өтті. Жиынға Орталық Азия халықаралық институты бөлімінің басшысы Азамат Тошев те қатысты.
Іс-шара Өзбекстан Республикасының Президенті жанындағы Стратегиялық және өңіраралық зерттеулер институты мен Қырғыз Республикасының Президенті жанындағы Ұлттық стратегиялық бастамалар институтының қолдауымен өткізілді.
Азамат Тошев отырыста «Өзбекстан мен Қырғызстан арасындағы екіжақты ынтымақтастықты тереңдету – өңірлік экономикалық интеграцияның негізі» тақырыбында баяндама жасап, Орталық Азиядағы көлік-логистика бағыттары мен экономикалық интеграцияны дамытудың басым бағыттарына тоқталды.
Сарапшының айтуынша, бүгінде жоғары деңгейдегі саяси диалог қарқынды дамып, екіжақты ынтымақтастықтың барлық бағытына стратегиялық бағдар беріп отыр.
Тұрақтылықты, тату көршілікті және өзара ынтымақтастықты нығайту жолындағы маңызды қадам ретінде 2025 жылы Өзбекстан, Қырғызстан және Тәжікстан басшылары «Мәңгілік достық туралы Ходжент декларациясына» қол қойды. Құжатта тараптардың өңірлік қауіпсіздікті қамтамасыз етумен қатар, сауда-экономикалық және көлік-логистикалық байланыстарды дамыту бағытындағы ынтымақтастықты одан әрі кеңейтуге деген ұмтылысы бекітілді.
Орталық Азия халықаралық институты өкілінің пікірінше, әлемдік экономиканың трансформациясы жағдайында көлік байланысы өңірдің тұрақты дамуы мен бәсекеге қабілеттілігін қамтамасыз ететін басты факторлардың біріне айналып отыр. Осыған байланысты аймақ елдері «Қытай – Қырғызстан – Өзбекстан» теміржолын салу, Трансауған көлік жобасын іске асыру және Орта дәлізді дамыту сияқты бастамаларға басымдық беруде. Бұл жобалар Орталық Азия үшін біртұтас көлік желісін қалыптастыруға ықпал етеді.
«Қытай – Қырғызстан – Өзбекстан» теміржолы жыл сайын 15 миллион тоннаға дейін жүк тасымалдауға мүмкіндік береді. Сонымен қатар жүк жеткізу қашықтығын шамамен 900 шақырымға қысқартып, тасымалдау мерзімін едәуір азайтады. Бұл аталған жобаның практикалық маңызын тек оған қатысушы үш мемлекет үшін ғана емес, тұтас Орталық Азия кеңістігі үшін де арттыра түседі.
Сөзінің соңында Азамат Тошев автомобиль және теміржол желілерін салу әрі жаңғырту, мемлекеттік шекаралардағы өткізу бекеттерін дамыту және өзге де инфрақұрылым нысандарын салуды көздейтін стратегиялық маңызы бар өңіраралық жобаларды жүзеге асыру үшін күш-жігерді біріктіру қажеттігін атап өтті.
