Боксчи қизларимиз қитъа чемпионатини 5 та медаль билан якунлади

Мўғулистон пойтахти Улан-Батор шаҳрида бокс бўйича Осиё чемпионати доирасидаги аёллар ўртасидаги якуний жанглар сарҳисобига кўра, Ўзбекистон терма жамоаси аъзолари 5 та медалга эга чиқди.

Бугун, 9 апрель куни терма жамоамиз аъзоларидан Азиза Зокирова -75 килограммда хитойлик Бао Цзига, Рухшона Парпиева -80 кило оғирликда қозоғистонлик Надежда Рябецга имкониятни бой бериб, қитъа чемпионатининг кумуш медалини қўлга киритди.

Чемпионатнинг ярим финал жангларида боксчи қизларимиздан Нигина Ўктамова (-57), Ойша Тоирова (-70) ва Олтиной Сотимбоева (+80) бронза медаль билан кифояланган эди.

Ушбу натижалар Ўзбекистон аёллар терма жамоаси аъзоларининг қитъа биринчилигини 2 та кумуш ва 3 та бронза медали билан якунлашига олиб келди.

Эртага, 10 апрель куни эркаклар ўртасида ўтказиладиган финал мусобақаларида терма жамоамизнинг 5 нафар аъзоси ғолиблик йўлидаги жангларда иштирок этади.

Т.Рўзиев,

ЎзА