“Бизнесни ривожлантириш банки” АТБ халқаро инвесторлар билан учрашув ўтказди
Бешинчи Тошкент халқаро инвестиция форуми доирасида “Бизнесни ривожлантириш банки” АТБ АҚШнинг етакчи инвестиция компанияларидан бири бўлган StoneX кўмагида халқаро инвесторлар - TB Capital Ltd ва VR Capital Ltd вакиллари билан учрашув ўтказди.
Учрашув давомида Банкнинг асосий молиявий кўрсаткичлари, активлар сифати, кредит портфели динамикаси, ликвидлик ва капитал етарлилиги даражаси, шунингдек, кичик ва ўрта бизнес субъектларини молиялаштириш ва қўллаб-қувватлаш бўйича амалга оширилаётган дастурлар юзасидан батафсил тақдимот ўтказилди.
Томонларга Банкнинг ўрта ва узоқ муддатли ривожланиш стратегияси, корпоратив бошқарув тизимини такомиллаштириш, рақамли трансформация жараёнлари ҳамда халқаро молия институтлари билан ҳамкорликни кенгайтириш борасида амалга оширилаётган ишлар ҳақида маълумот берилди.
Шунингдек, учрашувда Банкнинг халқаро капитал бозорларига чиқиш истиқболлари, жумладан, еврооблигациялар эмиссиясини амалга ошириш бўйича режалари ва ушбу жараён доирасида олиб борилаётган тайёргарлик ишлари муҳокама қилинди. Инвесторлар билан потенциал инвестицион ҳамкорлик йўналишлари, халқаро молиялаштириш манбаларини диверсификация қилиш ҳамда Банкнинг халқаро инвесторлар базасини кенгайтириш масалалари юзасидан фикр алмашилди.
Мулоқот давомида инвесторлар Ўзбекистонда амалга оширилаётган иқтисодий ислоҳотлар, банк-молия секторининг изчил ривожланиши ҳамда “Бизнесни ривожлантириш банки” АТБнинг кичик ва ўрта бизнесни қўллаб-қувватлашдаги муҳим ўрни ва эришаётган натижаларини алоҳида эътироф этди.
Учрашув якунида томонлар ўзаро ҳамкорликни янада ривожлантириш, мунтазам мулоқотни давом эттириш ҳамда халқаро капитал бозорларида истиқболли лойиҳаларни биргаликда кўриб чиқишдан манфаатдор эканликларини билдирди.
Мазкур учрашув Банкнинг халқаро инвесторлар билан алоқаларини мустаҳкамлаш, хорижий инвестицияларни жалб этиш ҳамда халқаро капитал бозорларидаги иштирокини кенгайтириш йўлидаги муҳим қадамлардан бири бўлди.
ЎзА
