Бекатда воркаут майдончаси ташкил этилди
Пойтахтимизнинг Сергели туманидаги автомобиль бозори яқинида жойлашган ва 12 та автобус йўналиши ўтадиган бекатда воркаут майдончаси ташкил этилди.
Йўл ҳаракатини ташкил этиш маркази ташаббуси билан бекат майдони қисқа муддатли жисмоний машғулотлар учун мўлжалланган унсурлар билан тўлдирилди. Бундай ёндашув аҳолининг қулайлиги, саломатлиги ва кундалик фаровонлиги учун ҳам муҳим ҳисобланади.
Энди йўловчилар автобус кутиш вақтидан енгил машқлар, тортилиш ёки оддий жисмоний ҳаракатлар учун фойдаланишлари мумкин. Бу эса спортни одатий шаҳар қатновига — ишга, ўқишга ёки уйга кетиш йўлига яқинлаштиради.
Бундай ечимлар бошқа шаҳарларда ҳам учрайди. Жумладан, Сеул, Пекин, Сингапур, Париж, Богота ва Калида автобус павильонлари турниклар, зинапоялар ва бошқа спорт анжомлари билан жиҳозланган кичик фаоллик ҳудудларига айлантирилган. Уларнинг ғояси оддий — ҳаракат кундалик ҳаётнинг табиий бир қисмига айланиши мумкин.
Тошкент шаҳар ҳокимлиги ахборот хизмати маълумотига кўра, шаҳар учун бундай бекат жамоат транспорти атрофида янада қулай муҳит яратиш йўлидаги яна бир қадамдир. Автобусларга устуворлик бериш нафақат йўналишлар, йўлаклар ва янгиланган бекат мажмуаларини, балки кутиш жараёнининг сифатини ҳам англатади: хавфсизлик, қулайлик, очиқлик ва аҳоли учун қўшимча имкониятлар.
Бундай объектлар аниқ манзилларда — аввало аҳоли зич жойлашган ҳудудлар, серқатнов йўналишлар тармоғига эга бекатлар ҳамда кутиш ва фаоллик ҳудудларини хавфсиз ажратиш учун етарли жой мавжуд бўлган ерларда ўрнатилади.
Асосий шартлар хавфсизлик, йўловчилар учун қулайлик, мустаҳкам конструкциялар, мунтазам техник хизмат кўрсатиш ҳамда жамоат транспорти ва пиёдалар ҳаракатига халақит қилмасликдир.
Шуни эслатиб ўтиш жоизки, жамоат транспортига устуворлик бериш пойтахт ҳокимлигининг асосий вазифаси бўлиб, бу иш нафақат янги йўналишлар ва йўлакларни, балки бир қатор қўшимча чора-тадбирларни ҳам ўз ичига олади.
Гулноза Бобоева, ЎзА
