Baxmalda gastronomik turizm manzili yaratilmoqda
Turizmni rivojlantirish ba’zan ulkan majmualar yoki yirik investitsiya loyihalaridan emas, balki odamlar har kuni ko‘zi tushadigan oddiy ko‘chalarning yangi qiyofasidan boshlanadi. Baxmal tumanidagi Oqtosh mahallasi hududidan o‘tuvchi Hamid Olimjon ko‘chasining ikki kilometr qismini gastronomik va turizm, savdo-servis xizmatlariga ixtisoslashgan zamonaviy ko‘chaga aylantirish bo‘yicha olib borilayotgan ishlar ana shunday yondashuvning amaliy ifodasidir.
Bu tashabbus hudud qiyofasini yangilash bilan cheklanmay, turizmni mahalliy iqtisodiyotning faol harakatlantiruvchi kuchiga aylantirishga qaratilgan. Loyiha doirasida ko‘chaning tashqi ko‘rinishini zamonaviylashtirish, tadbirkorlik va xizmat ko‘rsatish ob’ektlari uchun qulay muhit yaratish, aholi va mehmonlar uchun munosib infratuzilmani shakllantirishga alohida e’tibor qaratilmoqda.
Bu jarayon mamlakatda turizmni yangi bosqichga olib chiqishga qaratilgan davlat siyosati bilan hamohang. Davlatimiz rahbarining 2026-yil 27-avgustdagi “O‘zbekiston Respublikasi Prezidentining tadbirkorlar bilan VI ochiq muloqotida belgilangan vazifalarni amalga oshirish chora-tadbirlari to‘g‘risida”gi farmonida turizm sohasida tadbirkorlik loyihalarini moliyaviy qo‘llab-quvvatlashga alohida e’tibor qaratilgan. Hujjatda turizm sohasidagi tadbirkorlik tashabbuslarini rag‘batlantirish mexanizmlari belgilangani sohada yangi loyihalar uchun imkoniyatlarni kengaytiradi.
Baxmaldagi tashabbusni ana shu keng ko‘lamli maqsadlarning hududdagi amaliy ko‘rinishlaridan biri sifatida baholash mumkin. Zero, gastronomik ko‘cha bu faqat ovqatlanish joylari jamlanmasi emas. U mahalliy taomlar, savdo, xizmat ko‘rsatish, hunarmandchilik va sayyohlik tajribasini bir nuqtada uyg‘unlashtirib, hududning o‘ziga xosligini namoyon etadigan turistik manzil.
Bugun Hamid Olimjon ko‘chasida obodonlashtirish, savdo va xizmat ko‘rsatish nuqtalarini tartibga keltirish, tashqi qiyofani yaxshilash hamda infratuzilmani rivojlantirish ishlari davom etmoqda. Ishlar hali yakuniga yetmagan bo‘lsa-da, yangi xizmat ko‘rsatish maskanlari, savdo shoxobchalari va tadbirkorlik sub’ektlari faoliyatining kengayishi aholi uchun qo‘shimcha qulayliklar yaratmoqda.
Ayniqsa, bu kabi loyihalarning qiymati ularning bir vaqtning o‘zida bir nechta vazifani hal etishi bilan ahamiyatli. Zamonaviy ko‘cha hududning turistik jozibadorligini oshiradi, yangi xizmat turlarini paydo qiladi, tadbirkorlik faolligini kuchaytiradi va aholi uchun yangi daromad imkoniyatlarini vujudga keltiradi.
Baxmalning tog‘li tabiati, o‘ziga xos milliy taomlari va mehmondo‘stlik an’analari bilan uyg‘unlashgan bunday maskan kelgusida tumanning sayyohlik salohiyatini namoyon etuvchi muhim nuqtalardan biriga aylanishi mumkin. Eng muhimi, bu yerda turizm faqat sayyohni qabul qilish emas, balki mahalliy imkoniyatni qiymatga, tadbirkorlikni daromadga, oddiy ko‘chani esa hududning o‘ziga xos turistik manziliga aylantirish jarayonidir.
Abdujalol Qayumov,
O‘zA muxbiri
