Бангладешда қизамиқ касаллиги тобора авж олмоқда
Бангладешда сўнгги пайтларда юқумли касалликлар билан боғлиқ вазият кескин тус олмоқда. Хусусан, ўлкада қизамиқ туфайли ҳаётдан кўз юмганлар сони 500 нафардан ошди.
“Reuters” нашри тарқатган хабарга кўра, ҳалок бўлганларнинг 86 нафарида ушбу вирус таҳлиллар орқали аниқланган, яна 426 нафар болада эса касалликнинг клиник белгилари яққол намоён бўлган.
Маҳаллий соғлиқни сақлаш бош бошқармаси жорий йил баҳор ойларидаги (15 мартдан 23 майгача) вазиятни таҳлил қилиб, мамлакатда 62 мингдан зиёд одамда вирус аломатлари кузатилганини маълум қилди. Уларнинг 8,4 мингдан ортиғида тиббий лаборатория хасталикни тасдиқлаган.
Бундай оммавий касалланиш маҳаллий тиббиёт тизимига катта оғирлик олиб келди: шифохоналарда жой етишмовчилиги кузатилмоқда, айниқса, шаҳарларнинг қашшоқ маҳаллалари ва чекка овулларда аҳвол анча жиддий.
Шифокорларнинг билдиришича, мазкур хавфдан энг биринчи навбатда 5 ёшга тўлмаган болалар зарар кўрмоқда. Эмлаш вақтидан ўтиб кетган ёки умуман вакцина олмаган болаларда касаллик жуда оғир асоратлар билан ўтяпти.
Бундан аввалроқ, Жаҳон соғлиқни сақлаш ташкилоти ҳам режали вакцинациянинг сусайиши мана шундай йирик пандемик оқибатларга олиб келишидан огоҳлантирган эди. Айни пайтда Бангладеш ҳукумати инқироздан чиқиш учун тезкор чораларни бошлаб юборган. Жойларда қизамиқ ва қизилчага қарши фавқулодда эмлаш ишлари ташкил этилиб, чекка ҳудудларга мобил шифокорлар гуруҳи жўнатилди.
Организмнинг иммунитетини ошириш ва ўлим хавфини камайтириш учун болаларга А витаминини бепул тарқатиш йўлга қўйилди. Тиббиёт экспертлари ушбу вирусни дунёдаги энг тез тарқалувчи касалликлардан бири деб ҳисобласа-да, оддийгина икки дозалик вакцина орқали ундан бутунлай ҳимояланиш мумкинлигини эслатиб ўтади.
Ф.Яхшибоева, ЎзА
