БАӘ мен Сирия басшылары ынтымақтастықты нығайтпақ
Біріккен Араб Әмірліктері Президенті Мұхаммед бен Заид Әл Нахаян Сирия басшысы Ахмад аш-Шараны қабылдады. Кездесу барысында тараптар өзара қарым-қатынастарды нығайту және әсіресе экономикалық ынтымақтастықты кеңейту мәселелерін талқылады.
«WAM» хабарлауынша, көшбасшылар Таяу Шығыстағы жағдайды және оның қауіпсіздік пен әлемдік экономикаға әсерін жан-жақты қарастырды. Әсіресе өңірдегі тұрақтылық, теңіз қауіпсіздігі және геосаяси үдерістер келіссөздердің маңызды бөлігі болды.
Сирия басшысы Иран тарапынан жасалған шабуылдарды айыптап, оларды халықаралық құқық пен мемлекеттік егемендікке қайшы деп атады. Сонымен қатар, ол Біріккен Араб Әмірліктерінің қауіпсіздікті қамтамасыз ету бағытындағы шараларын жоғары бағалап, өңірлік тұрақтылықты сақтаудағы рөлін ерекше атап өтті.
Кездесу соңында мемлекет басшылары ынтымақтастықты одан әрі дамытуға ниетті екенін білдірген.
