Аргентинада минглаб одам намойишга чиқди
Аргентинада Президент Хавьер Милей ҳукумати томонидан таълим соҳасини молиялаштириш қисқартирилишига қарши минглаб одам норозилик билдириб, кўчаларга чиқди. Буэнос-Айрес ва мамлакатнинг бошқа йирик шаҳарларида ўтказилган оммавий акцияда касаба уюшмалари вакиллари, олимлар ва талабалар иштирок этди. Намойишчилар қўлларида шиорлар кўтариб, таълимга ажратилаётган маблағ камайтирилганига қарши чиқишди.
Айримлар тартиббузарлик содир этгач, хавфсизлик кучлари оломонни тарқатиш учун кўзни ёшлатувчи газ ва сув пуркагичдан фойдаланди. Тўқнашув оқибатида минглаб одам заҳарланиб, кўпчилик жабрланди. C5N телеканали оператори ҳамда бошига газ гранатаси теккан бир аёл ҳам тан жароҳати олди. Жувон маҳаллий ОАВга берган интервьюсида фарзандларининг бепул таълим олиш ҳуқуқини ҳимоя қилаётганини таъкидлади. Намойишчилар олий ўқув юртларига қўшимча маблағ ажратишни назарда тутувчи қонун ижросини таъминлаш, иш ҳақини ошириш ва давлат муассасалари молиялаштирилишини кўпайтириш талабини илгари суряпти.
Хавьер Милей 2023 йил декабрида лавозимга киришгандан бери амалга ошираётган бюджет харажатини кескин тежаш сиёсати давлат университетларига ҳам салбий таъсир кўрсатди. Ҳукуматнинг олий таълим муассасаларига ажратилган пулни музлатиб қўйиш ҳақидаги қарорига талаба ва ўқитувчилар мунтазам норозилик билдирмоқда.
Аввалроқ Конгресс томонидан университетлар бюджетини инфляцияга мослаб ошириш ва ўқитувчилар маошини қайта кўриб чиқишни назарда тутувчи қонун қабул қилинган. Президент эса молиявий чекловни важ қилиб, ушбу ҳужжатга вето қўйиши бутун мамлакат бўйлаб норозилик тўлқинини янада кучайтирди.
Ф.Яхшибоева, ЎзА
