АҚШ ва Эрон музокараси: Исломободда вазият ноаниқ
АҚШ вице-президенти Жей Ди Вэнс Эрон билан музокаранинг янги босқичи учун Покистон пойтахти Исломободга йўл олди. Воқеалар ривожи учун эса Теҳроннинг ушбу ташаббусга муносабати ҳал қилувчи аҳамиятга эга.
Президент Дональд Трамп маълум қилишича, АҚШ вакиллари душанба куни кечқурун манзилга етиб бориши кутиляпти. Оқ уй берган маълумотга кўра, делегация таркибига аввалги музокарада ҳам иштирок этган тажрибали маслаҳатчилар Стив Уиткофф ва Жаред Кушнер ҳам киритилган. Бу ҳақда BBC хабар берди.
Эрон томони ҳозирча учрашувдаги иштирокини тасдиқламаган. “Tasnim” агентлиги хабарига кўра, АҚШ томонидан Ҳурмуз бўғозида жорий этилган денгиз қамали бекор қилинмас экан, Теҳрон музокарага қўшилмаслигини билдирган. Давлат ахборот агентлиги IRNA эса Исломободда музокаранинг иккинчи босқичи ўтказилиши ҳақидаги хабарни кескин инкор этиб, ҳолатни Вашингтоннинг навбатдаги “медиа ўйини” сифатида баҳолаган. Теҳрон АҚШнинг кескин талаби, доимий ўзгариб турадиган қараши ва таҳдидли баёнотларини ҳам келишувга тўсқинлик қилаётган асосий омиллар сифатида кўрсатди. Қолаверса, Эрон Американинг музокара ҳақидаги чиқишларини эҳтимолий ҳарбий зарба олдидан тақилган “ниқоб” сифатида қабул қиляпти. Эслатиб ўтиш жоиз, музокаранинг биринчи босқичи 11-12 апрель кунлари натижасиз якунланган. Апрель ойи бошида тузилган икки ҳафталик муваққат сулҳ муддати эса 21 апрель куни тугайди.
Ф. Яхшибоева, ЎзА
