АҚШ Саудиянинг Ямандаги хусийларга зарба бериш таклифини рад этди
“Axios” нашри АҚШ расмийларига таяниб хабар беришича, Саудия Арабистони валиаҳд шаҳзодаси Муҳаммад бин Салмон Президент Дональд Трампга икки бор қўнғироқ қилиб, Ямандаги хусийларга қарши ҳарбий зарба йўллашни сўраган. Трамп эса таклифни рад этиб, Вашингтон ҳозирча бу гуруҳга қарши бевосита ҳарбий ҳаракат олиб боришни режалаштирмаётганига урғу берган.
Журналистларнинг шу мавзудаги саволига Оқ уй ва Саудиянинг Вашингтондаги элчихонаси дарҳол муносабат билдирмади.
Манба қайд этишича, Америка маъмурияти Яманда кескинлик кучайиб бораётганидан хавотир олиб, Саудияни қўллаб-қувватламоқда. Билъакс, низога бевосита аралашишдан қочяпти.
АҚШ Марказий қўмондонлиги раҳбари адмирал Брэд Купер шошилинч маслаҳатлашув ўтказиш учун Ар-Риёдга келди. Учрашув чоғи мезбон томонга Трампнинг асосий кўрсатмаси сифатида асосий кучни Эронни жиловлаш ва Ҳурмуз бўғозида хавфсизликни таъминлашга қаратиш, янги ҳарбий фронт очишдан эса сақланиш экани уқтирилган.
Июль ойи бошида хусийлар Сана аэропортига қўнишга тайёрланаётган Эрон фуқаролик самолётига халақит бермоқчи бўлган Саудия қирувчи самолётига қарши чора кўрилганини маълум қилган. Шундан сўнг Яман атрофидаги вазият янада кескинлашган эди. Бундан ташқари Қизил денгизда кема қатновини хусийлар ҳужумидан ҳимоя қилиш учун халқаро коалиция тузиш ҳаракати ҳам бошланган.
Ф.Яхшибоева, ЎзА
