АҚШ Россия нефтига нисбатан санкцияни тиклади
Яқин Шарқдаги инқироз фонида АҚШ Россия нефтига берилган вақтинча имтиёзни бекор қилди. Бу қарор халқаро энергия бозорида янги кескинлик даврини бошлаши мумкин.
Яқин Шарқдаги сиёсий ва иқтисодий инқироз фонида Россия нефти савдосига берилган имтиёзли давр якунланди. АҚШ Президенти Дональд Трамп маъмурияти РФ нефти ва нефть маҳсулотлари савдоси учун жорий этилган вақтинча енгилликни бекор қилди. “Moscow Times” нашри хабар беришича, 11 апрелдан бошлаб чеклов тўлиқ кучга кирди.
Илгарироқ 2026 йил 12 мартгача кемаларга юкланган хом ашёни сотишга рухсат берилган эди, бироқ энди бу муддат узайтирилмайди. Юмшатиш Яқин Шарқдаги кескинлик туфайли энергия бозорида юзага келган тақчиллик билан боғлиқ эди. Ҳурмуз бўғози эҳтимолий ёпилиши кунлик нефть экспортини 13 миллион баррелгача камайтириб юбориши мумкинлиги айтилган. Шунингдек, нарх 100 доллардан ошиб кетган.
Оқ уй глобал бозорни барқарорлаштириш мақсадида Россия ва Эрон нефтига қўйилган чекловни вақтинча юмшатишга мажбур бўлган эди. Эрон нефтига нисбатан жорий қилинган шундай рухсат эса 19 апрель куни кучини йўқотади. Халқаро энергия агентлиги эълон қилган сўнгги ҳисоботга кўра, юмшатиш даврида Россия нефть сектори сезиларли ўсиш қайд этди. Март ойида 19 миллиард долларга етган нефть ва нефть маҳсулотлари тушуми февралга нисбатан 9,3 миллиард дол кўпайди.
Умумий экспорт ҳажми кунига 7,1 миллион баррелни ташкил этган. Хом нефть экспорти 4,6 миллион баррелга, нефть маҳсулотлари 2,5 миллион баррелга етган. Қазиб олиш ҳажми эса кунига 10,32 миллион баррелни ташкил қилган.
Ф.Яхшибоева, ЎзА
