Апрель ойида олтин-валюта захиралари 1,9 миллиард долларга кўпайди
Ўзбекистоннинг халқаро захиралари апрель ойида сезиларли даражада ошиб, мамлакат молиявий барқарорлиги мустаҳкамланаётганини яна бир бор намоён қилди. Марказий банк маълумотларига кўра, март ойида кузатилган қисқаришдан сўнг апрель якунида олтин-валюта захиралари қарийб 1,9 миллиард долларга кўпайиб, жами 70 миллиард 891,9 миллион долларни ташкил этган.
Экспертлар фикрича, захиралар ўсишининг асосий омили жаҳон бозорида олтин нархининг юқорилаши билан боғлиқ. Апрель ойи давомида бир трой унция олтин нархи 4553,95 доллардан 4625,80 долларгача ошган. Натижада мамлакат захираларидаги олтин активлари қиймати янада кўпайган.
Шу билан бирга, захиралар таркибидаги олтиннинг физик ҳажми 40 минг трой унцияга қисқариб, 13,32 миллион трой унцияни ташкил этган. Бироқ нархларнинг ўсиши ҳисобидан олтин захираларининг қиймати 743 миллион долларга ортиб, 61,6 миллиард долларга етган.
Хорижий валютадаги захира активлари ҳажми ҳам ижобий динамикани сақлаб қолди. Хусусан, апрель ойида валюта активлари 1,151 миллиард долларга кўпайгани қайд этилди.
Иқтисодчилар таъкидлашича, халқаро захиралар ҳажмининг юқори даражада сақланиши миллий иқтисодиёт барқарорлигини таъминлаш, ташқи иқтисодий хавфларга қарши молиявий “хавфсизлик ёстиғи”ни мустаҳкамлаш ҳамда инвесторлар ишончини оширишда муҳим омил ҳисобланади.
Ш.Маматуропова,
ЎзА
