Анвар Анваров “Бриллиант лига” совриндори
Хитойнинг Шанхай шаҳрида енгил атлетика бўйича “Бриллиант лига” мусобақасининг илк босқич баҳслари бўлиб ўтди.
Дунёнинг энг кучли енгил атлетикачиларини жамлаган мусобақада Ўзбекистон шарафини ҳимоя қилган Анвар Анваров эркаклар ўртасида узунликка сакраш дастурида муносиб иштирок этди.
Қувонарлиси, атлетимиз мусобақада 8.01 метр натижа қайд этиб, учинчи ўриндан жой олди. Мамлакатимизнинг мазкур йўналишдаги мутлақ рекордчиси ҳисобланган Анвар Анваров мусобақа давомида икки бор мавсумдаги энг яхши натижасини янгилади.
Эслатиб ўтамиз, ўтган мавсум Лозаннада ўтган “Бриллиант лига”да ҳамюртимиз 7,84 метр натижа билан барча рақибларини ортда қолдириб, ғолиб чиққан иккинчи ўзбекистонлик атлет сифатида тарихга кирган эди.
Жавоҳир Тошхўжаев, ЎзА
