Ангренда “кўча безорилари” қилмишларига чек қўйилди
Тошкент вилояти Ангрен шаҳрида кўча безорилиги ва товламачилик билан шуғулланган уюшган жиноий гуруҳ қўлга олинди.
Хусусан, жорий йил 2 апрель куни мазкур ҳудудда яшовчи 1992 йилда туғилган, “Помидор” лақабли Х.С ўз танишлари 2003 йилда туғилган Х.А ва 2003 йилда туғилган А.У лар билан бирга жамиятда юриш-туриш қоидаларини менсимасдан, ҳеч бир сабабсиз бошқа шахсга қарши кўча жангларини уюштирган.
Ушбу воқеанинг гувоҳи бўлган ва жанжаллашаётганларни ажратишга ҳаракат қилган 2002 йилда туғилган Б.Ж ва 2002 йилда туғилган С.А ларга ҳам воқеа жойида тан жароҳат етказилган. Натижада улар Ангрен шаҳар тиббиёт бирлашмасига мурожаат қилади. Тиббий хулосага кўра, муштлашув натижасида фуқаро Б. Ж нинг чап пастки ёпиқ жағ суяги синиши, юмшоқ тўқималар лат ейиши, чап қорин соҳаси жароҳати аниқланди.
Шундан сўнг тартиббузарларнинг хатти-ҳаракатларига нисбатан жабрланувчилар ҳуқуқ-тартибот идораларига ариза йўллади. Шу асосида Ангрен шаҳар ИИБ тергов бўлими томонидан Жиноят Кодексининг тегишли моддалари билан жиноят иши қўзғатилди. Ҳуқуқбузарликда гумонланувчи шахслар тегишли тартибда қўлга олинди. Ҳолат бўйича дастлабки тергов ҳаракатлари олиб борилмоқда.
Шу кунларда Тошкент вилояти бўйлаб Президентимизнинг 2026 йил 5 январдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида” ҳамда “2026 йилда республика маҳаллаларида жиноятчиликнинг барвақт профилактикаси самарадорлигини янада ошириш бўйича ташкилий чора-тадбирлар тўғрисида”ги қарорлари ижросини таъминлаш борасида тизимли ишлар қилиняпти.
Бироқ шунга қарамай ўзи яшаб турган жойда ёмон ном чиқараётган, амалдаги қонунларни менсимай юқоридаги каби салбий ҳолатларни содир этаётган айрим шахсларнинг учраётгани ачинарлидир.
А.Мусаев,ЎзА.
