Әндіжанда гастрономиялық туризм көшесі ашылды
Президент Шавкат Мирзиёев Әндіжан қаласының «Урикзор» махалласында ұйымдастырылған гастрономиялық туризм көшесімен танысты.
«Машраб» және «Сарыкүй» көшелерін қамтитын жобаның жалпы құны 18 миллиард сумды құрайды. Оның 8 миллиард сумы республикалық бюджеттен, 10 миллиард сумы кәсіпкерлердің қаражаты есебінен қаржыландырылды.
Көшенің жалпы ұзындығы 1,2 шақырымды құрайды. Мұнда жаяу жүргіншілер мен велосипедшілерге арналған кең әрі қауіпсіз жолдар салынды, заманауи ландшафт дизайны жасалып, субұрқақтар мен түрлі жарықтандыру құралдары орнатылды. Сонымен қатар селфи аймақтары, ашық спорт алаңдары, балаларға арналған экологиялық алаңдар және отбасылық демалыс орындары ұйымдастырылды.
Аумақтағы 35 сауда нысанында 30 кәсіпкерлік субъектісі тәулік бойы қызмет көрсетеді. Жоба аясында 100 жаңа жұмыс орны ашылды. Көше күніне 10 мыңнан астам тұрғын мен туристі қабылдай алады.
Мемлекет басшысы көше бойымен серуендеу барысында тұрғындармен және кәсіпкерлермен әңгімелесті.
