“Аксилкоррупция волонтёрлари” ҳаракатини ташкил этиш таклиф қилинди
Коррупцияга қарши курашиш агентлиги директори Акмал Бурхонов ҳамда Сенат раисининг биринчи ўринбосари, Жаҳон иқтисодиёти ва дипломатия университети ректори Содиқ Сафоев ўртасида учрашув бўлиб ўтди.
Унда коррупцияга қарши курашиш соҳасидаги ҳамкорликни янада кенгайтириш масалалари муҳокама қилинди.
Қўшма лойиҳалар ва тадқиқотларни амалга ошириш, комплаенс назорат тузилмалари ходимлари учун услубий қўлланмалар ва ўқув дастурларини ишлаб чиқиш, соҳага оид халқаро ҳужжатларни миллий қонунчиликка имплементация қилиш жараёнларига университет профессор-ўқитувчилари ва экспертларини жалб этиш, университет талабаларининг Агентликда малакавий амалиёт ўташини ташкил этиш бўйича келишувларга эришилди.
Мулоқот якунида мазкур чораларни амалга ошириш, Агентлик ва Университетнинг ўзаро алоқаларини институционал даражада мустаҳкамлаш ҳамда уни янги босқичга олиб чиқиш мақсадида ҳамкорлик келишуви имзоланиши белгилаб олинди.
Шундан сўнг мамлакатимиз бўйлаб ташкил этиб келинаётган "Раҳбар ва ёшлар" туркум тадбирлари доирасида Агентлик директорининг университет талабалари билан очиқ мулоқоти ҳам ўтказилди.
Мулоқот давомида ёшлар ўртасида коррупцияга қарши маданиятни шакллантириш, ҳалоллик қадриятларини кенг тарғиб қилиш ҳамда уларнинг мазкур жараёнлардаги фаол иштирокини таъминлаш борасида амалга оширилаётган ишлар ҳақида маълумот берилди.
Учрашувда университетда “Аксилкоррупция волонтёрлари” ҳаракатини ташкил этиш таклифи илгари сурилди.
Мулоқот чоғида талабаларнинг коррупцияга қарши курашишга оид таклиф ва ташаббуслари ҳам тингланди. Агентлик директори уларни қўллаб-қувватлаш ҳамда амалиётга кенг жорий этиш юзасидан ўз фикр-мулоҳазаларини билдирди.
Н.Абдураимова,
ЎзА
