2025 жылғы 29–30 мамыр күндері Астанада өтетін Astana International Forum (AIF – 2025) әлем назарын аударып отыр.

Ауқымды іс-шараға әлемнің 70-тен астам елінен 600-ге жуық шетелдік делегаттар, соның ішінде мемлекет және үкімет басшылары, халықаралық ұйым жетекшілері, ірі бизнес өкілдері мен сарапшылар қатыспақ.

Форум бағдарламасы заманауи негізгі мәселелерді қамтиды. Іс-шара аясында жалпы отырыс және 25 пікірталас пен талқылауға негізделген диалог алаңдары ұйымдастырылады.

Форумда Қазақстан Президенті Қасым-Жомарт Тоқаев, Руанда Президенті Пол Кагаме, Солтүстік Македония Президенті Гордана Силяновска-Давкова, сондай-ақ басқа елдердің премьер-министрлері мен вице-премьерлері қатысады.

Сондай-ақ, БҰҰ-ның 8-бас хатшысы, Жасыл жаһандық өсім институтының төрағасы, «Boao Forum for Asia» директорлар кеңесінің төрағасы Пан Ги Мун, Еуропа кеңесінің бас хатшысы Ален Берсе, Дүниежүзілік зияткерлік меншік ұйымының бас директоры Дарен Танг, Дүниежүзілік банктің Еуропа және Орталық Азия бойынша вице-президенті Антонелла Бассани, БҰҰ Даму бағдарламасы бас хатшысының орынбасары және әкімшілік орынбасары Хаолян Сюй, Азия инфрақұрылымдық инвестициялар банкінің президенті және директорлар кеңесінің төрағасы Цзинь Лицюнь, ЕҚДБ бірінші вице-президенті Юрген Ригтеринк, Түркі мемлекеттері ұйымының бас хатшысы Қубаничбек Омуралиев, сондай-ақ БҰҰ-ның басқа құрылымдарының басшылары форумға қатысады.

70-тен астам елден келген жетекші ақпарат агенттіктері, телеарналар және басқа да бұқаралық ақпарат құралдарының өкілдері форум жұмысын тікелей жарияламақ.

«AIF – 2025» аясында сыртқы саясат және халықаралық қауіпсіздік, энергия және климаттың өзгеруі, сондай-ақ экономика мен қаржы сияқты жаһандық мәселелерге назар аударылады.

Форум ашық диалог, шетелдік капитал тарту, стратегиялық келісімдер жасау және экономикалық дамуға бағытталған бастамаларды ілгерілету үшін маңызды алаң болады деп күтілуде.

Норгул Абдураимова,

ӨзА

(Ташкент- Астана).