Өзбекстан ұлттық құрамасының қорғаушысы Абдуқодир Хусанов елдің ең қымбат футболшысы мәртебесіне ие болды.

Transfermarkt платформасы Франция чемпионатында ойнап жүрген футболшылардың жаңартылған трансферлік құнын жариялады. 

Қазіргі таңда Францияның «Ланс» клубында ойнап жүрген Абдуқодир Хусановтың трансферлік құны 12 миллион еуроға жеткен.

Айта кету керек, ұлттық құраманың қорғаушысы осы маусымда өзінің шеберлігі мен сенімді ойынының арқасында клубтың негізгі құрамынан орын алды.

Хусанов бірнеше матчта үздік немесе кем дегенде үздік ойыншылардың бірі ретінде бағаланды. Сонымен қатар, қазан айында ол Франция чемпионатының ең үздік жас футболшысы атағын иеленді.

Қазіргі уақытта Хусанов Франция чемпионатындағы орталық қорғаушылар арасында 21-орынды, ал 21 жасқа дейінгі орталық қорғаушылар арасында 2-орынды иеленіп тұр. Бұл көрсеткіштер оның Өзбекстанның ең қымбат футболшысы атануына себеп болды.

Бұл нәтиже өзбек футболы тарихындағы екінші үздік көрсеткішке айналды. Бұған дейін 2021 жылы Элдор Шомуродов «Рома» клубына ауысқаннан кейін оның трансферлік құны 14 миллион еуроға бағаланған болатын.